Oallugat sihkkelastejit gárrenoaivvis.
Trygg Trafikk čállá preassadieđáhusas ahte leat kárten dábiid sin gaskkas geat sihkkelastet. Okta gávnnus lea ahte measta bealli, namalassii 43 proseantta, leat sihkkelastán gárrenoaivvis. Dasa ii liiko Trygg Trafikk.
– Vaikko ii leat promillarádji go sihkkelastá, de lea aŋkke ovddasvástádus johtolagas ja ferte dorvvolaččat sihkkelastit. Árvvoštallannákca, riskaárvvoštallan ja reakšuvdnanákca váikkuhuvvojit jođáneappot go doaivu. Dat lea várálaš sihke dutnje ja earáide. Danne oaivvildit mii ahte olbmot berrejit jurddašit sihkkela birra seammaládje go biilla: Ale duohtat dan go leat juhkan, dadjá Trygg Trafikk gulahallanráđđeaddi Ann-Helen Hansen.
Jealbmageavaheapmi lassánan
Viidáset čállá Trygg Trafikk ahte oaivesuodjegeavaheapmi lea lassánan. 54 proseantta čuoččuhit ahte sii álo geavahit oaivesuoji, ja 19 proseantta geavahit eanas áiggi oaivesuoji.
– Liikká leat measta 19 proseantta geat hárve dahje eai oba ane ge oaivesuoji. Lea buorre go ovdána rievttes guvlui, muhto lea šállošahtti go 19 proseantta vel eai leat ipmirdan manne atnit oaivesuoji. Lea eanas oanehis mátkkiin go olbmot eai nahket suoji, dadjá Hansen.
