Vuoiŋŋas, oađe bures ja páhkke biilla albmaládje. De gal biilamátki šaddá sihke buoret, suohttasit ja eambbo sihkkarabbo.
Olbmot borret gaskabeivviid, čállet teakstadieđuid giehtatelefovnnain ja vel vuidet ámadaju vuojedettiin.
Ja velá vearrát diŋggaid ge barget go vudjet.
– Dat sáhttá leat heaggaváralaš, olmmoš ii leat akto luotta nalde! Diimmá geasi dieđihuvvui olles 926 olmmošroasmmohuvvama johtolagas. Dus lea stuora ovddasvástádus go vuoját biillain, dadjá Roger Ytre-Hauge, fágahoavda mohtora siskkobeale Frende dáhkádusfitnodagas NTB:ii.
Páhkke albmaládje
– Oadjebas biilamátki álgá ovdal go leat vuodján mehtera, go sihkkarasttát gálvvu albmaládje. Oallugat vudjet nu ahte leat lossa ja luovos dávvirat biillas, čilge Ytre-Hauge NTB:ii.
Frende dáhkádusa biilaolmmái muitala ahte lossa ja stuorra dávvirat fertejit bidjot vuolemussii ja čohkkánsaji vuostá.
– Luovos dávvirat fertejit sihkkarastojuvvot. Jus don šattat fáhkka goazastit go vuoját 50 km/dii de boađášii 20 kilo losu seahkka 1,25 tonna fámuin ovddasguvlui. Jurddaš jus dat deaivá du dahje mánáid biillas, dadjá Ytre-Hauge.
Son maid rávve olbmuid geavahit guorbmefierpmi ja jus dakkár ii leat, de ii galgga goassege páhkket badjelii go čohkkánsaji čielgi.
Dán čállá NTB.
