Ruoŧa sámeministtar Alice Bah Kunke lohká boazosuolavuođa ja sámevaši leat dohkketmeahttumin ja lohká ráđđehusa ovttas Sámedikkiin fertet reageret dása.
Ruoŧa sámeministtar Alice Bah Kunke lohká boazosuolavuođa ja sámevaši leat dohkketmeahttumin ja lohká ráđđehusa ovttas Sámedikkiin fertet reageret dása.
Mannan vahkkus čalmmustahtii ruoŧa TV4 prográmma «Kalla fakta» mo sámit vásihit boazosuolavuođa ja ahte olbmot rahpasit vašuhit sápmelaččaid.
Ruoŧa Kultur- ja demokratiijaministtar Alice Bah Kunke, geas leat sámeáššit ovddasvástádussan, gohčoda dán dili dohkketmeahttumin ja dáhttu ráđđehusa ovttas Sámedikkiin reageret dása, čállá oddasat.se.
– Dat maid mun oidnen lea seamma váivi go dohkketmeahttun, dadjá Alice Bah Kunke.
– Fertet dán vuođul hábmet politihka
Ministtar lohká ahte dan vealaheamis man sámit leat vásihan áiggiid čađa leat ain váikkuhusat. Son oaivvilda ahte vuosttaš maid ráđđehus berre dahkat lea vuhtiiváldit dán ja hábmet politihka dan vuođul ahte dás leat ain váikkuhusat, dan oaidná earret eará go geahččá statistihkat mat čájehit ahte nuorra sámit vedjet hejot psykalaččat.
– Dasto galgat dahkat dan maid leat álgán ja nannet sámedikki, nu ahte sámediggi oažžu nana resurssaid čađahit iežaset doaimma. Lassin dasa ahte nannet sámi kultuvrra ruhtadeami, de fertet maid joatkit eastadit rasismma ja vealaheami servodagas, dat fertet dahkkot jo skuvladoaimmahagas, ealli historjjá forumain ja eará instánssain, lohká Bah Kunke.
Kunke lohká ahte lea buorre go «Kalla fakta» čalmmustahttá dákkár fáttáid, go leat hui olu olbmot geat eai dovdda ruoŧa historjjá ja eai dieđe makkár váikkuhusat dás ain leat.
