-Almmuhus-
OĐĐASATSihke illu ja beahttašupmi fakultehtain

Sihke illu ja beahttašupmi fakultehtain

-

-

Universitehta stivra oaivvilda ahte mearrádus galgá álkidit, buoridit ja ođasmahttit Universitehta. Gávcci fakultehta leat rievdan guhtta fakultehtan.

Universitehta lea máŋggaid oktiičaskimiid bokte sturron ja šaddan okta Norgga stuorámus universitehtain, mas leat 16 000 oahppi ja 3500 bargi. Universitehta stivra lea odne dahkan mearrádusa mas leat ossodagaid sirdimat guovddážis, ja mearrádus lei ovttajienalaččat, dieđiha UiT Norgga árktalaš universitehta preassadieđáhusas.

 

Mearrádus beahttá maid

Juridihkalaš fakultehtas illosit go besset ain bissut fakultehtan. Valáštallan, mátkeealáhus ja sosiálafága Fakultehta ges lea beahttašuvvan go heaittihit sin fakultehta.

– Lea hui positiiva go čohkkejit fágabirrasiid Álttás ja Romssas. Lea maid stuora ovdamunnin go virgádit guovllurektora Áltái geas galgá leat dehálaš rolla čohkket fágalaš aktivitehta olles Finnmárkkus ja Davvi-Romssas, ja sihkkarastit ahte jođiheapmi lea sajis dán guovllus, oaivvilda humanoria, servvodatdieđa ja oahpaheaddjioahpu Fakultehta dekána Sonni Olsen. Nubbi guovllurektor galgá ges virgáduvvot Hárštták gávpogii ja jođihit dan guovllu.

– Seammás beahttá mearrádus ollislaččat UiTs, go ii daga universitehta oktasažžan, oaivvilda Olsen.

 


 

Ođđajagemánu 1.beaivvi rájes galgá UiT Norgga árktalaš universitehtas leat guhtta fakultehta. Ođđa fakultehtat šaddet ná:

· Dearvvašvuođadieđa fakultehta + Suodjalandivššu ossodat + Valáštallanallaskuvla

· Luonddudieđa ja teknologiija Fakultehta + servvodatsihkkarvuođa, sihkkarvuođa ja gearggusvuođa fágabiras

· Inšenevradieđa ja teknologiija Fakultehta

· Juridihkalaš Fakultehta

· Biodieđa, guolásteami ja ekonomiija Fakultehta

· Humanoria, servvodatdieđa ja oahpaheaddjioahpu Fakultehta + Mátkeealáhus ja Davviguovllu oahpuid Instituhtta + Mánáidsuodjalus ja sosiála barggu Instituhtta.

-Almmuhus-