Diimmá vuoiti Sigrid Ekran čájehii vuot nuppi jagi maŋŋálaga, ahte gii lea máilmmi čeahpimus beanavuoddji.
Son joavddai mollii beal viđas ja vuostáiváldui olmmošvalvvis mii huikkii su nama go rasttildii moallasárgá.
Ii jurddašan gilvvu
Nugo diibmá, de lea son measta čađat vuodján njunnošis maŋŋel Njávdám1 rájes, vaikko veterána guovttos Kjell Brennodden ja Ralph Johannessen leaba geahččalan doarridit su.
– In leat jurddašallan nu ollu gilvvu birra, muhto baicce eambo iežan ráiddu birra ja lean čađat vuodján beatnagiid dáhtu mielde, čilgii son.
Sus ledje ain 11 beatnaga ráiddus go vuoddjái Joatkkas ja bođii seammá loguin mollii, váiban, muhto lihkolažžan.
– Jáhkán ahte lei riekta vuodjit dássedit ja vuoiŋŋastit dávjá, go dat orro doaibmamin hui bures mu beatnagiidda, čilgii son.
Ođđa barta
Buoremus vuoddji oktiibuot FL-1000 gilvvus 2014:s ja 2015:s vuoitá Saltdalshytte bartta, mas lea árvu 540 000 ruvnnu ja dán faskii Sigrid Ekran dál, muhto ii leat vuos nu sihkar gosa áigu dan cegget.
– Lea juoga maid lean jurddašallan, inge dieđe sihkkarit gosa háliidan dan cegget, muhto navdimis deike juosat, čilge son.
Barta lassin vuittii son ođđa njealjejuvllaga ja 70 000 ruvnnu ruhtavuoittu, vaikko sus lea jo ođđa vuoján diimmá vuoittu maŋŋel.
Eambbo leahttu
Diimmá vuodjináiggi ektui lea Ekranas leamaš ollu eambbo leahttu Kárášjogas Jotkii, iige mihkkege orron čájeheamen ahte veterána guovttos joksaba diimmá vuoiti. Son vuoddjáige maŋimuš vuoiŋŋastanbáikkis ovdalaš ovtta ja Johannessen beannot diimmut su maŋábealde.
– Mus lei máilmmi buoremus beanaráidu, mii barggai buot maid galggai riekta, nu ahte lei dušše návddašit reagas, lohká ođđa Máilmmimeašttir dakka maŋŋel go joavddai mollii.
Oadjebas vuoitit
Son lei maiddái nu oadjebas iežas vuoittus, ahte válljii váldit diimmu liige vuoiŋŋastan bottu Joatkkas, juoidá maid ovdal ii leat dahkan, ovdal go jotkkii maŋimuš 5miilla mátkki mollii Álttá guovddážii.
– Ii diehtán riekta gos Ralph ja Kjell leigga, muhto dihten ahte mus lea buorre áigi. Mu mielas beatnagat ánssášedje vuoiŋŋastit, veahá borrat ja čuohkat, ja dasa lassin lei mus nu káffegoiku, čaimmihii Ekran.
