-Almmuhus-
OĐĐASAT– Sierralohpi Deanus bođii measta beare maŋŋit

– Sierralohpi Deanus bođii measta beare maŋŋit

-

-

Morten Blien oaččui loahpas Deanu gielddastivrras sierralobi vuodjit deanu mielde skohteriin ja geahččalit bidjat máilmmiolahusa.

Deanu gielddastivrra liigečoahkkimis meannudedje odne Deanu mohtorsearvvi ja Morten Bliena sierralobiohcama ja mearridedje addit sierralobi Blienii vuodjit Deanu mielde. Deanu gieldda sierralobilávdegoddi leage ovdal hilgon sierralobiohcama, ja gielddastivra válljii loktet ášši meannudeapmái.

 

Ráhkkanišgoahtán Kárášjohkii

Gielddastivra mearridii 15 jienain guovtti jiena vuostá dohkkehit sierralobiohcama. Morten Blien lea hui duhtavaš go mearrádus dahkkui ja lei nu čielga eanetlohku.

 – Mu vuosttaš jurdda lea ahte lea buorre go dohkkehedje, muhto mun in dieđe vel rievdada go dat maidege. Dál lea birrasii logi beaivvi dassá go galggan vuodjit, nu ahte Deanu gielddastivrra mearrádus bođii measta beare maŋŋit. Deatnu láve čavččabeallái sáhttit dulvat, ja lean maid juo ráhkkanišgoahtán Kárášjogas vuodjit, lohká Blien.

 

Gákti gal galgá badjelis

Blien lohká lea ollu organiseren go galgá vuodjit, ja danne lea maid eahpesihkar olle go šat plánet Deanu váldit mielde plánaide.

 – Dál goit álggos ain dušše jurddašan Kárášjogas vuodjit, muhto in vel dieđe. Dan maid dieđán lea ahte Kárášjoga gákti gal galgá badjelis go vuoján, vaikko vel gitta Detnui, lohká Blien.

 

 

 

-Almmuhus-