Lágidemiide besset buot nuorat gaskal 13-20 jagi searvat.
Diimmá smávva Márkomeannu festiválas, Márkomenožis, lei vuosttaš geardde go «Siiddastallan» lágiduvvui. Dalle doaimmai joavku bures.
«Siiddastallan» lea joavku nuoraide mas besset seamma campas idjadit, fárrolaga servvoštallat ja suohtastallat, ja dan lágida Noereh organisašuvdna fárrolaga Márkomeannu festiválain.
– «Siiddastallan» lea njuolgut okta geasseleaira mainna galgat olahit buorebut vuolleahkásaččaid. Dat galgá leat oadjebas báiki gos besset servvoštallat festiválarigeara haga, lohká Noereh organisašuvnna jođiheaddji Lars-Bjørnar Knutsen.
Sullii 20 saji
Knutsen muitala ahte sii eai vel leat ráddjen sajiid áibbas, ja ahte deháleamos lea oaidnit juohke ovtta nuora.
– Mii leat ráddjen saji 20 olbmui, muhto dat sáhttá rievdat. Vuolgá das man olusat mii leat geat bargat nuoraiguin.
Campa ii leat dušše vuolleahkásaččaide, dasa sáhttet gitta 20-jahkásaš nuorat searvat.
– Mis lea maid njuolggadus ahte 18-20-jahkásaččat eai galgga juhkat alkohola, go mii eat háliit ahte sii geat juhket galget seamma báikkis idjadit go vuolleahkásaččat.
Muđui lohká Noereh jođiheaddji ahte sii sávvet ahte geasseleairalágideapmi geasuha, ja šaddá buorre.
– Mii sávvat ahte šaddá kula ja hippa!, lohká Noereh jođiheaddji Lars-Bjørnas Knutsen.
