Márkomeannu feastivála lágida mánáide sierra festivála maid sii gohčodit «mánáidmeannu». Dán jagaš prográmmas festivála fállá juohkelágán stohkosiid mánáide guokte beaivvi.
Márkomeannu feastivála lágida mánáide sierra festivála maid sii gohčodit «mánáidmeannu». Dán jagaš prográmmas festivála fállá juohkelágán stohkosiid mánáide guokte beaivvi.
Mánáidmeannu lágiduvvo bearjadaga ja lávvardaga suoidnemánu 24.-25.beivviid Márkomeanu festiválabáikkis Gállogiettis. Goappaš beivviid leat rabas duodjebuvddat mánáide gos besset fitnat ja searvat iešguđetlágan duodjedoaimmaide ja stohkosiidda. Goappaš beivviid lea maid vejolaš oahppat davvisámegiela 1-2-3 sierra kurssa bokte, ja vánhemat besset maid áinnas searvat.
Juffá boahtá mánáidmennui
Muitalusat leat guovddážis dán jagi Mánáidmeanus. Bearjadaga besset mánát deaivvadit Ánte Mihkkal Gaup ja su máinnalmas figuvrrain Juffá festiválagirjerádjosis. Juffá boahtá njuolga geasseorohagas mearragáttis ja sus leat doppe máŋga gelddolaš fearána muitalit.
Lávvardaga besset mánát ges deaivvadit Ingá Márjá Sarre ja guldalit árbevirolaš máidnasiid seaguhuvvon juoigamiin, rapain ja ritmmaiguin go čájálmas Gávvilis rieban lea álgopremieara. Sarre ovttas čuojaheaba ráppár Áilu Valle ja rumbbučuojaheddjiin Kenneth Ekornes. Čájálmasa bagadalli lea Sara Margrethe Oskal.
Stohkosat ja gilvvut mánáide
Dán jagi lea maid sierra prográmma unnimus mánáide. Mánáidmeanu «miniprográmma» lágiduvvo sihke bearjadaga ja lávvardaga ja lea heivejuvvon 0–6-jahkásaš mánáide.
Dán jagi lea maid vuosttaš geardde go čađahit «Márkomeanu Searaide!» hástalusa. Márkomeanu Searat lea joavkohástalus gos mánát besset speallat «quiz:a», searvat viehkangilvui ja áđđenstalkanstohkosiid. Mánáidmeannu loahpahuvvo «rappenkurssain» lávvordaga maŋŋilgaskabeaivvi.
– Máŋgga mánáide lea Mánáidmeannu vuosttaš deaivvadeapmi Márkomeanuin, ja mánát leat dehálaš ulbmiljoavku min festiválii. Danin galgá sis váldit várá ja vuoruhit sin, dadjá Márkomeanu festiválajođiheaddji Marita Kristin Eilertsen, guhte sávvá ahte ollu mánát bohtet festiválii.
Márkomeannu lágiduvvo suoidnemánu 23.–25. beivviid.
