-Almmuhus-
-Almmuhus-
OĐĐASATSiđašii NAV čavget beaive­ruđaid juollu­deami

Siđašii NAV čavget beaive­ruđaid juollu­deami

-

-

NAV čoahkkimis digaštalle váttisvuođa oažžut bargiid ealáhusaide.

Geassemánu 21. beaivvi lágidii Guovdageainnu NAV čoahkkima suohkana fitnodagaide. Doppe ovdanbuvttii NAV iežaset doaimma birra, mo barget fátmmastemiin ja rekrutteremiin ja NAV vugiid ovttasbargat bargoaddiiguin.

– Mii lágideimmet dan dihte go háliidat buoret gulahallama ja ovttasbarggu min suohkana fitnodagaiguin. Háliideimmet maid gullat fitnodagaid vuordámušaid NAV:i ja makkár dárbbut sis leat dan ektui maid mii sáhttit fállat, muitala Guovdageainnu NAV jođiheaddji, Berit Annette Hætta.

Váilot bargit

Rema 1000 giehmánni, Ida Halvorsen, lei vuolgán čoahkkimii. Son lei duđavaš čoahkkimiin, muhto son maid bijai vuordámušaid Guovdageainnu NAV:i.

– Lei miellagiddevaš čoahkkin. Ohppen olu iešguđet doaibmabijuid birra mat gávdnojit jus goassege dárbbašivččii daid. Váldosivva manne mun ledjen doppe, lei jearrat NAV:s mo sii sáhttet leat veahkkin váttisvuođain oččodit bargiid, muitala Halvorsen.

Beaiveruhta

Borramušrámbuvrra giehmánnin lea Halvorsen vásihan váttisvuođa oččodit bargiid. Son diehtá ahte oallugat rahčet háhkamis bargiid iešguđet ealáhusaide. 

– Mo jurddašat NAV sáhttá leat eambbo veahkkin?

–  Vuolgá das man oallugat ožžot doarjaga go eai bargga. Árvidan oallugat ožžot beaiveruđa, nu ahte jurddašan NAV sáhttá čavget dan juolludeami ja ahte olbmot fertejit geahččalit bargoeallima. In dieđe mo doaibmá dat proseassa, muhto doaivvun ahte bijaše buoret ja garraset eavttuid ohcciide vai suohkana bargosajiide galgá ávkin, vástida Halvorsen.

NAV jođiheaddji, Berit Annette Hætta, ii jáhke leat ávkin čavget juolludeami:

– Leat gáibádusat sidjiide geat ožžot beaiveruđa, ja mii čuovvut daid njuolggadusaid mat mis leat. In oainne ahte NAV galgá čavget dan go mis leat iešguđet gáibádusat ohcciide. Earret eará lea aktivitehtagáibádus, ahte galget aktiivvalaččat ieža ohcat barggu ja nu ain. Sáhttet dieđusge leat eará ákkat manne eai oza dihto bargosajiide, muhto dan mii maid čuovvolat, dadjá Hætta.

OLLES NORGGAS: Guovdageainnu NAV jođiheaddji, Berit Annette Hætta, diehtá ahte olles Norggas rahčet háhkamis bargiid ealáhusaide. Vuorkágovva: Nils Johan Vars.
OLLES NORGGAS: Guovdageainnu NAV jođiheaddji, Berit Annette Hætta, diehtá ahte olles Norggas rahčet háhkamis bargiid ealáhusaide. Vuorkágovva: Nils Johan Vars.

Buohkaide váttisvuohta

NAV jođiheaddji muitala ahte váttisvuohta guoská olles Norgii ja leat olu ealáhusat mat rahčet háhkamis bargiid. Erenoamážit dearvvašvuođasuorggis, fievrrideamis ja koahkkasuorggis váilot oahppan olbmot. NAV bokte sáhttet ohccit oažžut gelbbolašvuođaloktema.

– Lea hástalus olles Norggas gávdnat bargiid. Leat olu rabas virggit, muhto eai leat rivttes ohccit deavdit daid virggiid. Dávjá sáhttá nu ahte sis geat leat ohccit NAV:s ii leat rivttes gelbbolašvuohta das maid fitnodagat ohcet, muhto mii fas bargat hui olu gelbbolašvuođaloktemiin. Mis leat dakkár kvalifiserendoaibmabijut, nu ahte ohccit geain ii leat oahppu, sáhttet NAV bokte oažžut dan oahpu, muitala Hætta.

-Almmuhus-