Sámi Musihkkafestivála ja Melodi Grand Prix leat álggahan ovttasbarggu, dainna ulbmiliin ahte SGP vuoiti galgá beassat njuolga MGP finálii boahtte jagi rájes.
Sámi Musihkkafestivála ja Melodi Grand Prix leat álggahan ovttasbarggu, dainna ulbmiliin ahte SGP vuoiti galgá beassat njuolga MGP finálii boahtte jagi rájes.
Boahtte jagi rájes soaitá sámi artista juohke jagi mielde Melodi Grand Prix (MGP) musihkkagilvvus.
Sámi Musihkkafestivála lea šiehtadallame MGP lágideddjiiguin ahte Sámi Grand Prix lávlunoasi vuoiti galgá beassat njuolga Norgga MGP finálii.
Sámi Musihkkafestivála buvttadeaddji Ol Johan Gaup lea hui rámis ovttasbargguin, muhto deattuha ahte eai leat šiehtadallamiiguin vel geargan.
– Mis leat ságastallamat leamaš Melodi Grand Prix bargojoavkkuin ja NRK:in. Mii áigut geahččalit oažžut juo dán jagi vuoiti boahtte jagi MGP-gilvui, ja sávan dat lihkostuvvá, muitala son.
Loktet stuorát lávdái
Daid šiehtadallamiid leat álggahan maŋŋil go mearriduvvui ahte Liet International ii lágiduvvo go juohke nuppi jagi.
Dasto ii beasa go juohke nuppi jagi vuoiti searvat Eurohpá unnitálbmotgielaid musihkkagilvui.
– Eanet ja eanet sámi artisttat servet Melodi Grand Prixii, sihke Norggas, Suomas ja Ruoŧas. Earret eará Jon Henrik Fjällgren ja Agnete Johnsen. Muhto maid Elin Kåven ja Hilda Länsman, geat maid leaba Sámi Grand Prixii searvan. Mii áigut loktet sámi artisttaid stuorát lávdái, ja Melodi Grand Prix heive bures, čilge Gaup.
Son čilge ahte leat maid gávnnaheame movt sáhtášii juoiganoasi vuoiti loktet stuorát lávddiide.
Jotket šiehtadallat maŋŋil Eurovision-gilvvuid
Sihke Sámi Musihkkafestivála ja Melodi Grand Prix bargojoavkkus lea dál hušas áigi.
Sámi Musihkkafestivála lea bargame beassášfestiválain, ja MGP bargojoavku fas Eurovision gilvvuide ráhkkaneame.
Danne fertejit joatkit šiehtadallamiiguin maŋŋil go leat geargan goappaš doaluiguin.
– Leat ain olu oasit maid fertet čielggadit, ja mii joatkit šiehtadallamiiguin maŋŋil Eurovision gilvvu, lohká Sámi Musihkkafestivála buvttadeaddji.
Son lasiha ahte ii sáhte vuos nu olu detáljjaid muitalit, go ii leat vuos čielggas movt ášši šaddá.
Hástalusat
Leat maid muhtin hástalusat čadnon dasa jus SGP vuoiti galgá searvat MGP:i, go MGP:s galget lávlagat mat eai leat ovdal gullon.
– SGP vuoiti ii beasa gal searvat vuoitolávlagiin, muhto mii leat geahčadeamen čovdosiid diesa, lohká Gaup ja namuha earret eará ahte oassi SGP vuoittus, man artisttat leat geavahan ráhkkanit konsertii man besset doallat beassášfestiválas jagi maŋŋil go vuitet, sáhttá geavahuvvot MGP ráhkkaneapmái.
– Mii leat jurddašeamen sáhtášii go vuoitu geavahuvvot baicce ráhkadit MGP lávlaga ja ráhkkanit dieidda gilvvuide, čilge Gaup.
NRK duođašta
Melodi Grand Prix buvttadanjoavku NRK:s duođašta ahte sii leat gulahallan Sámi Musihkkafestiválain, ja sin mielas lea gelddolaš ovttasbargu.
– Mii jáhkkit fásta sámi oasseváldi buvttášii oasi musihkkagilvui mii lea erenoamáš, lohká buvttadanjoavkku gulahallanolmmoš.
Sii lohket ahte lea ain olu mii galgá čielggaduvvot ja ahte sii álget dainna stuora bargguin maŋŋil go gerget Eurovision gilvvuin.
– Mii illudit álgit dainna bargguin, mii oaidnit dan hui positiivvalažžan ja sávvat ahte beassat oaidnit sámi oasseváldi MGP lávddi alde juohke jagi dás ovddasguvlui.
Bidjala čorvviid das oaivái
– Wow, man somá!
Dan logai artista Elin Kåven ja movttáskii go oaččui dán dieđu.
Kåven leage ieš vuoitán SGP lávlunoasi ja maiddái oassálastán MGP-gilvvuin.
Son lea hirbmat positiiva dan ovttasbargui ja lohká sus lea doaivva dasa.
– Dies gal boahtá albma buorre gilvu! Mun leange vásihan ahte MGP han lea justa seamma go SGP, dušše stuorát juohke láhkai nu go lávddi, gilvvu artisttaid gaskka, TV-kanála, eambbo gehččiid ja ártegis biktasiid dáfus.
Kåven lohká iežas gáhtat go ii searvan dán jagáš Sámi Grand Prixii, muhto boahtte jagi gal áigu fas searvat.
– Ii leat eará go bidjalit čorvviid fas oaivái ja dieđihit SGP:i boahtte jagi, dadjá Kåven.
