Ráđđehus oaivvilda ahte Sosialisttalaš Gurutbellodaga evttohus heaittihit šiehtadusa Suomain Deanučázádaga birra, lea seamma go jápminduopmu lussii.
Ráđđehus oaivvilda ahte Sosialisttalaš Gurutbellodaga evttohus heaittihit šiehtadusa Suomain Deanučázádaga birra, lea seamma go jápminduopmu lussii.
Norga ja Suopma leat soabadan ođđa šiehtadusa mainna galget ráddjet luossabivddu, ná sávvet earret eará hearkkes luossanáli oažžut vejolašvuođa nanosmuvvat, čállá Dagsavisen.
– Jápminduopmu
Sosialisttalaš Gurutbellodaga (SG) lea duhtatmeahttun šiehtadusain, ja ožžot doarjaga Bargiidbellodagas ja Guovddášbellodagas, evttohussii ahte hilgut šiehtadusa, ovdal go dat lea doaibmagoahtán ge.
Bellodagat baicce háliidit ođđa eará šiehtadusa.
– Dál lea mis buorre šiehtadus mas lea alla dássi birasáššiid dáfus, man mielde ráddjet guolásteami nu ahte šaddá ceavzilis bivdu. Dása ii mieđa SG ja dat evttohus maid sii leat ovddidan šaddá njulgestaga jápminduopmun Deanučázádaga luossanállái, oaivvilda Birasministtar Vidar Helgesen Olgešbellodagas.
– Fertejit vuhtiiváldit báikkálaš vuoigatvuođaid
SG leat ovttaoaivilis ahte guolásteapmi ferte ráddjejuvvot, muhto oaivvildit ahte sámi ja báikkálaš vuoigatvuođat eai leat doarvái bures vuhtiiváldon.
– Go juhket guolástanvuoigatvuođaid de lea dehálaš vuhtiiváldit báikkálaš guolásteami ja sámi kulturguddiid, lohká SG stuorradikkeáirras Kirsti Bergstø.
– Astoáigebivdu ferte eanemus ráddjejuvvot. Muhto mun háliidan deattuhit ahte evttohusas ii leat sáhka das man olu galgá beassat bivdit, muhto geat galget beassat bivdit ja dan proseassas mii lea vai olahat dasa, lohká son.
(©NTB)
