Dál leat Semisjaur-Njarg čearu boazoeaiggádat politiijaide váidán guorbmebiilavuoddji gii mannan vahkus bekkii go lei filbmen go oaguha bohccuid geainnu mielde. Dát galgá deaividan sin čearu guohtuneatnamiin Árjepluovi gielddas.
Mannan vahkus dat almmustuvai filbma mas guorbmebiilavuoddji oaguhii čorraga guorbmebiillain alla leavttuin seammás go son filbmii dáhpáhusa. Filmma son almmuhii Facebookii rabas jovkui. Dál leat Semisjaur-Njarg čearu boazoeaiggádat váidán dáhpáhusa politiijaide. Dáhpáhus galgá deaividan sin čearu guohtuneatnamiin Árjepluovi gielddas.
Duođaštit váidaga
Norrbottena politiija Davvi regiovnna guorahallanjođiheaddji Inge Barsk duođašta ahte váidda lea boahtán politiijaide. Nu čállet SR Sámi Radio ja SVT Sápmi.
Semisjaur-Njarg čearru lea gávnnahan ahte dáhpáhus lea geavvan Jäkkvikas vihtta kilomehtara nuorttabealde Arjatpluovi. Sii leat dal váidán guorbmebiilavuoddji politiijaide go oaivvildit ahte guorbmebiilavuoddji rihkku máŋga lága, sihke elliidsuodjaluslága ja boazodoallolága.
– Ruoŧas galget máilmmi buoremus lágat elliidsuodjalusa ektui. Dál lea miellagiddevaš čuovvut politiijaid ja áššeguoddi guorahallama. De mii beassat diehtit guoská go elliidsuodjalusláhka bohccuide maid, dadjá Semisjaur-Njarg čearu sátnejođiheaddji Anders Erling Fjällås SR Sámeradio ja SVT Sápmái.
