-Almmuhus-
-Almmuhus-
-Almmuhus-
OĐĐASATSeminára movt jávkadit CWD-dávdda

Seminára movt jávkadit CWD-dávdda

-

-

Norgga, Amerihká ja Kanada čeahpit muitalit iešguđet dilálašvuođaid birra áššis ja evttohit vejolaš hálddahuslaš doaimmaid maid sáhttá čađahit dávdda leavvamis ja movt jávkadit dávdda.

Heaggavárálaš, njoammu vuoiŋŋamašdávda lea fargga 50 jagi leamaš dovddus ášši Davvi-Amerihkás. Dávda njoammu sarvvaelliide nu go ealggaide, bohccuide, vuovderuoigguide, ruoigguide ja gottiide.

2016:s gávdnui dávda fáhkka gottiin ja ealggain Norggas. Dávda lea ovdalaččas dušše leavvan Amerihkás, Kanadas ja Lulli-Koreas (elliin mat leat importerejuvvon Kanadas), ja gávdnui vuosttaš geardde Norggas mannan giđa.

Chronic Wasting Disease (CWD)

Chronic Wasting Disease (CWD) falleha guovddášfierpmi eallis ja bilida vuoiŋŋamaččaid nearvaseallaid.

Dávda leavvá gulul ja loahpas ruoidná ealli ja láhttenvuohki rievdá ovdal go jápmá.

Veterinearainstituhtta bivdá olbmuid dieđihit sidjiide jus oidnet gottiid mat eai leat dearvašat.

Norggas leat geassemánu rádjái golmma eallis duođaštuvvon CWD dávda, ovtta gottis Lærdalas ja guovtti ealggas Trøndelágas.

Gáldu: Norgga Veterinearainstituhtta

 

Váikkuhusat viidát

Dál, go gávdnui dávda Norggas, de čájehuvvo ahte lea luoddaearru sihke Norgga ja Eurohpá fuođđohálddašeamis, mas váikkuhusat čuhcet viidát, muitala Biebmobearráigeahčču. Máŋggaid logiid jagiid vásáhus njoammudávddain Amerihkás ja Kanadas čájeha ahte lea váttis doaibma iskat ja jávkadit dávdda ruoigoelliin.

 

Rabas seminára

«Eastadit cwd-dávdda Norggas – makkár strategiijat leat buoremusat» lea fáddá semináras mii lágiduvvo duorastaga.

Seminára lágiduvvo Felix Konferánsaguovddážis, Aker Brygges, Oslos, duorastaga diibmu 12:s 18.15 rádjái. Seminára sáhtát maid neahta bokte čuovvut ja lea rabas buohkaide.

Lágideaddjit leat Biebmobearráigeahčču, Veterinearainstituhtta, Dutkanráđđi ja Norgga biras- ja biodieđalaš universitehta (NMBU).

-Almmuhus-