Ođđa plánejuvvon giellaguovddáš Kárášjogas lea ožžon 20 000 ruvdnosaš prošeaktadoarjaga Finnmárkku fylkkagielddas, čađahit prošeavtta «Arena 2: Nuoraid lávdi».
«Arena 2: Nuoraid lávdi» prošeavtta váldoulbmil lea deattuhit sohkabealrollaid, seksualitehta ja givssideami.
Ohcamis boahtá ovdan ahte prošeavtta olis háliidit sámegielain čilget ja govvet nuoraid dili ja sin jurdagiid sohkabealrollaid, seksualitehta, givssideami ja veahkaválddi birra.
Kárášjoga gielda lei ohcan 30 000 ruvnno prošektii, muhto ožžo 20 000 ruvnno.
Lávdečájálmas
Kárášjoga giellaguovddáš lea plánen ráhkadit lávdečájálmasa mas lea rollaneaktiin sámegillii, oktan luohte- ja musihkkačehpiiguin ja eará lávdedáiddáriiguin.
Rollaneaktimis maid oahppá eastadit ja vuosttaldit diliid mat dovdojit áittan, boahtá ovdan Kárášjoga gieldda prošeaktačilgehusas fylkkagildii.
Sámegiella hedjona
Kárášjoga gielda čállá vuođđun prošektii lea ahte gávdnojit uhcán arenat gos nuorat sáhttet sámegillii muitalit fáttáid birra, ja ahte sámegiella vásihuvvo hedjonan nuoraid gaskkas
Giellaguovddáš
Kárášjohkii galgá ásahuvvot giellaguovddáš dán jagi, mii galggašii koordineret gielladoaimmaid Kárášjogas ja ovttasbargat mánáidgárddiiguin ja skuvllaiguin.
Oktiibuot gávdnojit Norggas 14 sámi giellaguovddáža mat galget čalmmustahttit, nannet ja ovddidit sámegiela lagasbirrasiin.
Buot sámegiela hálddašanguovlluin, earret Kárášjogas, lea leamašan giellaguovddáš. Kárášjoga gielda lea dál virgádeamen giellaguovddášbargi guhte galgá bargat earret eará «Arena 2: Nuoraid lávdi» prošeavttain.
