-Almmuhus-
-Almmuhus-
GUOIMMUHEAPMISearvvai ja vuittii

Searvvai ja vuittii

-

-

Vegard Olsen (26) lea vuosttaš vahku vuoiti Ávvira ealgabivdogilvvus. Searvva don ge, de sáhtát vuoitit 5 000 ovddas skeaŋkakoartta!

Ávviris lea dál jođus gilvu ealgabivdiide, ja vuosttaš vahkus, mii álggii čakčamánu 1. beaivvi ja bisttii 4. beaivái, lea dušše okta searvan gilvui ja sádden ealgagova.

Dat lea 26-jahkásaš guovdageaidnulaš Vegard Olsen, ja nu son vuittiige Ávvira gaibagahpira ja t-báiddi, dasa lassin oažžu son vel mátketelefonveaskku man Finnmárkkuopmodat FeFo lea skeŋken gilvui.

 

Ii leat vel vihkkehan

Son searvvai gilvui vuonjalronožiin man bážii lávvardaga sullii gaskabeaiáigge, nuorta-lulábealde Duolbajávrriid Siebes.

Ealgga deattu ii loga vuos diehtit go ii leat vel vihkken dan.

– Muhto jus galggan árvvoštallat, de jáhkán dan deaddit birrasii 140 kilo. Mii leimmet sávvan juste dákkára beassat báhčit, mii eat láve nu illudit daid boares elliid báhčit, čilge Vegard.

(Ášši joatká gova vuolábealde)


DUĐAVAŠ: Vegard Olsen. Priváhtagovva

Nuoramus fertii njáhkat

Vegard lea bivddus earret eará iežas stuorravieljain, ja muitala ge dás mo manai lávvardaga go bážii ealgga:

– Mu viellja dat áiccai dan ealgga váre alde ja logai ahte mun, guhte lean nuoramus, dat ferten njáhkat dan lusa. Moai leimme vajálduhttán daid rádioid, nu ahte son šattai telefuvnna bokte bagadallat mu vai deaivvan ealgga lusa njáhkat. In oaidnán ealgga ovdal go ledjen áibbas lahka dan, dat lei livas ja geahčai njuolga munnje, de bessen livas báhčit dan, muitala Vegard.

Dát lea viđát ealga man lea báhčán dan rájes go čuovvugođii ealgabivdduid, vuosttaš ealgga bážii 2011:s.

 

Ávvir sávvá lihku Vegard Olsenii, son lea maiddái mielde váldovuoittu vuorbádeamis ja sáhttá vuoitit 5 000 ruvnno árvosaš skeaŋkakoartta.

Háliidat go don maid searvat nie mo Vegard? De lasit gova dáppe.

-Almmuhus-