Sámedikki ságajođiheaddji Tuomas Aslak Juuso bovde buohkaid searvat Sámi álbmotbeaivvi ávvudeapmái njuolggosáddaga bokte.
Virtuáladáhpáhus sáddejuvvo Sajosis sotnabeaivve 6.2. diibmu 16 rájes. Sámedikki ságajođiheaddji Tuomas Aslak Juuso hástá buohkaid geahččat sáddaga.
– Dál lea nubbi jahki go mii ávvudit Sámi álbmotbeaivvi virtuálalaččat. Háliidat bovdet sámeálbmoga ovttas ávvudit dán dehálaš beaivvi ja seammá háve galledit virtuálalaččat min Sámedikkis ja maiddái sierra guovlluin Sámiid ruovttuguovllus, lohká ságajođiheaddji Tuomas Aslak Juuso preassadieđáhusas.
Guoimmuheapmi
Sáddagis lea ságajođiheaddji álbmotbeaivvi dearvvahus, sámemánáid dearvvuođat ja das beassá návddašit musihka ja oanehisfilmmaid. Anna Morottaja, gii gieskat lea almmustahttán máilmmi vuosttas livđe-skearru, loaiddasta árbevirolaš anárašgielat musihka. Ulla Pirttijärvi & Ulda -joavkku Gávcci jagiáigge -konsearta buktá ovdan davviluonddu temáid Ulla Pirttijärvi persovnnalaš muittuid bokte. Dat geavvá musihkalaš ságastallama árbevirolaš sámekultuvrra ja dálá máilmmi gaskkas. Sáddagis maiddái lea Čeavetjávrri skuvlamánáid ráp-video.
Sáhttá searvat
Sámedikkis dieđihit vel ahte juohkehaš sáhttá oassálastit dáhpáhussii nu ahte sádde álbmotbeaivvi dearvvuođaid nummirii +358 40 663 4493 teakstasániin dahje juo Whatsapp bokte. Twitteris #SámiÁlbmotbeaivi – mearkkain sáhttá maid cealkit dearvuođaid.
