Guovdageainnu ja Kárášjoga johttisápmelaččaid listtuin lea seamma ulbmil ahte boazodoallu galgá nannejuvvot suohkanis, muhto Kárášjogas lea arvat unnit doarjja Johttisápmelaččaid listui go Guovdageainnus.
Guovdageainnu ja Kárášjoga johttisápmelaččaid listtuin lea seamma ulbmil ahte boazodoallu galgá nannejuvvot suohkanis, muhto Kárášjogas lea arvat unnit doarjja Johttisápmelaččaid listui go Guovdageainnus.
Guovdageainnu Johttisápmelaččaid listtus (GJL) leat vihtta áirasa suohkanstivrras, ja lea ge dakko stuorimus bellodat Guovdageainnu suohkanstivrras, dássálaga Sámeálbmot bellodagain geain maid leat vihtta áirasa. Kárášjoga johttisápmelaččaid listtu (KJL) lea fas unnimus bellodat Kárášjoga gielddastivrras, ovttain áirasiin.
Unnit jienasteaddjit
Logut mat bohtet ovdan resurssarehketdoalus čájehit ahte Kárášjoga boazodoallu lea arvat unnit go Guovdageainnu boazodoallu. Jus buohtastahttá, de lea Guovdageainnu guovdajohtolagas eambbo boazosápmelaččat (716 olbmo) go olles Kárášjoga boazodoalus leat (685 olbmo). Oktiibuot leat 1450 boazosápmelačča Guovdageainnus. Diehttelasat leat daid gaskkas olu mánát ja vuolleahkásaččat, muhto dat buktá goit juogalágan gova makkár jienasteddjiid vuođđu lea goappáge suohkanis.
Eará bellodatárbevierut
Guovdageainnu johttisápmelaččaid listtu (GJL) sátnejođiheaddjievttohus, Anders S. Buljo, lohká diehttelasat leat unnit boazodoallit Kárášjogas go Guovdageainnus, ja dan geažil eai soaitte nu olu jienaid oažžut, muhto son jáhkká maid eará ákkaid leamen.
– Kárášjogas leat áiggiid čađa leamašan hui nannosat dáčča bellodagat, nu go Bargiidbellodat ja Guovddášbellodat, dat sáhttá leat okta ágga. Muhto okta lea sihkkar, jus johttisápmelaččaid listtu jienastat, de lea áibbas sihkkar ahte du beroštumit váldojit vuhtii. Dáččabellodagain sáhttet oainnut mat eai heive boazodollui, ja daid šaddet de goitge áirasat bealuštit, lohká Buljo.
Unnit doarjja
Logut mat valg.no neahttasiiddus čájehit ahte Guovdageainnus ledje maŋemus válggas 1534 olbmo geat jienastedje. Sin gaskkas jienastedje 396 olbmo GJL. Dat leat 25,8 proseantta jienain. Kárášjogas fas ledje 1421 geat jienastedje, ja 85 jienastedje KJL. Dat ii leat go guhtta proseantta jienasteddjiin geat dorjo sin. Jus buohtastahttá man olu boazodoallit leat Kárášjogas, de leat badjelaš beali unnit go Guovdageainnus. Jus livččii galgat seamma doarjja go Guovdageainnus jienasteddjiid gaskkas, de livččii galgat KJL oažžut juoba 12 proseantta ge jienain. Dan eai daga.
Nanusmahttet
Kárášjoga Johttisápmelaččaid listtu sátnejođiheaddjievttohus, Anders Somby Jr, lohká sin válgagičču maŋŋonan iešguđetge sivaid dihte. Muhto dál son lohká iežas gearggus vuolgit johttit boazosápmelaččaid mielde geasseorohagain.
– Min bellodat manai NRK Sámi oaiviliskkadeamis fas seamma dássái go ovddit áigodagas leimmet ja goalmmádin stuorimus bellodat Kárášjogas. Sávvamis mii ovdánit fas, vai oažžut juoba guokte áirasa gielddastivrii, lohká son.
Somby ii loga sáhttit čilget manin sii masse nuppi áirasa gielddastivrras maŋemus válggas, muhto lohpida boazosámiid beroštumiid váldit vuhtii jus sii ožžot luohttámuša boahtte áigodagas gielddastivrras.
Deaivat jienasteddjiid
Buljo muitala ahte sii eai nu bearehaga čuočču giliid guovddážiin ja vikka muitalit sin politihka birra, sus lea baicca eará vuohki mii orru doaibmame.
– Mun finan boazosápmelaččaid guossis, gos sii besset mus njuolga jearrat máid mii oaivvildit. Mun vuohttán das orru leamen ávki, go mii leat 1999 rájes ožžon eambbo ja eambbo jienasteddjiid, muitala son vel loahpas.
(Ášši lea almmuhuvvon báberaviissas 29.08.15)
