-Almmuhus-
-Almmuhus-
-Almmuhus-
OĐĐASATSávvet oallugiid searvat

Sávvet oallugiid searvat

-

-

Ruoŧa duohtavuohtakommišuvnna stivrenjoavku sávvá oallugiid searvat ja buktit evttohusaid fáttáide maiguin duohtavuohtakommišuvdna galgá bargat. 

Ruoŧa Sámedikki bargu duohtavuohtakommišuvnna sajáiduhttimiin sámi álbmogis lea bures jođus. Korona-dávda lea hehtten fysalaš čoahkkimiid. Dál sii geahččalit dievasmahttit čoahkkimiid jearahanskoviiguin, čállá Sámediggi iežas ruovttosiiddus. 

Sámediggi lea ásahan stivrenjoavkku mas leat čieža lahtu, ja maiddái virgádan prošeaktajođiheaddji. Dasto lea maid nammaduvvon vásedin referánsajoavku.

Sámedikki stivrenjoavku dán prošeavttas leat mearridan ahte lassin dialogačoahkkimiidda de galget olbmot beassat buktit oaiviliid čálalaččat jearahallanskovi bokte. Dáid beivviid sii sáddejit sámi álbmogii diehtojuohkingihppaga mas lea liŋka jearahallanskovvái. Sii geahččalit olahit nu oallugiid go sáhttet sierra kanálaid bokte, ee. sámi jienastuslogu, sámi servviid, sámi organisašuvnnaid ja sámediggebellodagaid miellahtuid bokte.

Stivrenjoavku lea maid gáibidan guhkidit prošeaktaloahppameari miessemánu 31. beaivái 2021, dainna ákkain ahte eai leat sáhttán doallat daid álbmotčoahkkimiid/gulaskuddančoahkkimiid maid lei áigon, ja go jearahallanskoviid vástádusaid ádjána čohkket. 

-Almmuhus-