Čakčamánus galgá Nordisk Natt i Naturen nammasaš organisašuvdna ávvuduvvot vuosttaš geardde.
Ávvudeapmi lea ovttasbargu gaskkal Norgga, Ruoŧa, Dánmárkku ja Suoma olgoáibmoorganisašuvnnain. Sii leat bovden buohkaid Davveriikkain vásihit ovtta ija luonddus.
Norsk Friluftsliv lea oktasašorganisašuvdna dain 18 stuora olgoáibmoeallinorganisašuvnnain Norggas. Sii leat okta dain geat lágidit Nordisk Natt i Naturen, ovttas Ruoŧa Friluftsfrämjandet , Dánmárkku Friluftsraadet, ja Suoma Suomen Latuin.
– Mii leat olu olgun birra jagi, ja dat čatná min riikkaid oktii. Lea hui fiinna Davviriikkalaš árbevierru mii ánssaša ávvudeami, dadjá Norsk Friluftsliv gulahallanráđđeaddi, Linn Elise Jakhelln.
Áigot hástalit olbmuid
Seammás go ávvudeapmi galgá nanusmahttit oktavuođaid riikkaid gaskkas, lea das maid ustitlaš gilvu.
– Mis lea dieđusge mihttu Norga šaddá dat riikka mii oažžu eanemus olbmuid olggos lundui. Mii sávvat olbmot leat gergosat váldit dán hástalusa, dadjá Jakhelln.
Natt i Naturen ii leat amas Norggas. Dat našuvnnalaš oađđit-olgun-idja čalmmustahttojuvvo vuosttaš vahkkoloahpa čakčamánus juohke jagi, 2015 rájes.
– Vaikko dán jagi lea veaháš earálágan dát idja, de lea olu norgalaččain dát šaddan árbevierrun, dadjá gulahallanráđđeaddi Norsk Friluftslivas.
Olgun oađđit čakčamánu 3.beaivvi
Nordisk Natt i Naturen lea oktasaš ávvudeapmi, muhto Norggas ja Ruoŧas idjadit olgun lávvordaga, čakčamánu 3. beaivvi, Suomas ja Dánmárkkus fas lávvordaga, borgemánu 27. beaivvi.
Dat lea beare merket kaleandarii vuosttaš lávvordaga čakčamánus dál juo!
– Buot maid dárbbašat jus áiggut searvat lea oađđenseahkka, tealtá dahje juoga mas oađát. Leaš dál verándas, vári alde, sáttogáttis dahje vuovddis, dan mearridat ieš, loahpaha Jakhelln.
