-Almmuhus-
SMÁVVAOĐĐASATSávvet ahte nuorat ohcet sti­peandda

Sávvet ahte nuorat ohcet sti­peandda

-

-

Sámi duojárat, dáiddárat ja kulturbargit miehtá Sámi sáhttet dál ohcat Sámiráđis stipeandda ruovtturesidensii 2023 giđđii.

Ruovtturesideansa stipeanddaid ulbmil lea fállat sámi dáidda- ja kultursuorgái vejolašvuođa čiekŋudit kreatiivvalaš bargguide ja seammás láhčit vejolašvuođa bargat kreatiivvalaš oktasašvuođas ovttas sámi eará kulturbargiiguin.

– Sámis leat hirbmat unnán vejolašvuođat bargostipeanddaide. Bargostipeanddat leat dehálaččat min kulturčehpiide, vai sii besset vuoruhit áiggi bargamii ja buvttadeapmái. Sámiráđđi háliida ruovtturesideanssain nannet dáiddáriid ja kulturbargiid barganvejolašvuođaid, dadjá Sámiráđi kulturčálli Unna-Maari Pulska preassadieđáhusas.

– Movttiidahtti beassat juogadit

Ruovtturesideansa lágiduvvo dál nuppes. Pulska muitala Sámiráđi ožžon buori máhcahaga ovddit resideanssas.

Ovddit ruovtturesidensii serve Carola Grahn (dáidda), Ingir Ane Bål (filbma), Sami Ásllat Laiti (duodji), Valentina Sovkina (árbediehtu) ja Vitaly Sapelnikova (duodji).

– Oasseváldit muitaledje ahte sii gártet dávjá bargat akto. Sii gávnnahedje ahte lei movttiidahtti beassat juogadit jurdagiid ja plánaid resideanssas earáiguin geat ipmirdit kreatiivvalaš barggu ja proseassa. Sii ovdanbukte nubbi nubbái iežaset bargguid neahttadeaivvademiin ja besse ovddidit bargguideaset oktasaš ságastallamiid bokte, muitala Pulska.

Sávvet nuoraid ohcat

Preassadieđáhusas boahtá ovdan ahte Sámiráđđi háliida ruovtturesideanssain nannet maiddái sohkabuolvvaid gaskasaš oktavuođa sámi kultursuorggis. Sii sávvet ahte maiddái nuorra dáiddárat, duojárat ja kulturbargit ohcet ruovtturesidensii.

Doarjagiid juohkimis mearrida Sámiráđi kulturlávdegoddi.

-Almmuhus-