Bađašjoga siida, ovttas Guovdageainnu suohkaniin, ávžžuhit dál buot skohtervuddjiid várrogasat vánddardit Vuorašvári guovllus, ja maid doahttalit ahte eai vuoje Vuorašvári mielde vaikke vel leat vuodjinlobi ožžon.
Bađašjoga siida, ovttas Guovdageainnu suohkaniin, ávžžuhit dál buot skohtervuddjiid várrogasat vánddardit Vuorašvári guovllus, ja maid doahttalit ahte eai vuoje Vuorašvári mielde vaikke vel leat vuodjinlobi ožžon.
Sihke čakčat, giđđat ja dálvet lea gullon ahte Fylkkamanni gidde mohtorjohtolaga guovlluin gos leat bohccot.
Earret eará lea Guovdageainnu suohkanis dovddus ášši go Mierona guovllus leat juo moadde jagi guokte orohaga bivdán Finnmárkku fylkkamanni giddet visot mohtorjohtolaga guovllus gos sis leat bohccot.
Bađašjoga siida váldet eará vugiid atnui.
Soahpan ávžžuhit
Nils Peder I. Gaup, Bađasjoga siiddas, čilge ahte sii eai hálit gielddit báikki olbmuid vánddardeamis iežaset lagas guovllus, ja danin sii eai hálit seaguhit Fylkkamanni dán áššái.
Sii leat baicca soahpan, ovttas Guovdageainnu suohkanin, ahte sii ávžžuhit skohtervuddjiid ahte eai vuoje Vuorašvári mielde.
Sávvá doahttalit
Nils Peder I. Gaup ávžžuha dál skohtervuddjiid, leaš dál sierravuodjinlobi ohcan dahje ii, ahte eai vuoje Ásllagašjávrris Vuorašvári mielde Várenaljávrái, ja das fas viidáset Čuonjájávrái dahje Čuonjáluobbalii.
Muhto baicce jus Ásllagašjávrris fitná, de vuodjá fas vulos Vuorašjávrái, ja doppe fas dan láhtu mielde bajás Várenaljávrái.
– Mihttu lea ahte olbmot vudjet várrogasat dál, ja eai njulget, go mis leat bohccot doppe. Mii hálidit gulahallat ja mun gal jáhkán manna bures. Sávan dat doahttalit, lohká Gaup.
Árvvus atnit earáid
Guovdageainnu suohkana meahcástanlávdegotti jođiheaddji, Per Nils Saari, ii loga sin geassán sierravuodjinlobiid eret sis geat leat ožžon dakkáriid, muhto deattuhit ahte boađus sáhttá leat, jus ávžžuhus ii doahttaluvvo, ahte siiddas lea vejolaš ávžžuhit Fylkkamanni giddet mohtorjohtolaga guovllus.
– Mun gal rámidan Bađašjoga siidda go dákkár vuogi geahččalit. Mun ávžžuhan dál olbmuid doahttalit dan ávžžuhusa, lohká Saari.
Gaup lohká ahte sii háliidit árvvus atnit earáid doaimmaid.
– Mii atnit árvvus báikkiolbmuid ja ávžžuhit ahte eai vuoje Vuorašvári mielde, ja árvidan sii maid atnet árvvus min ávžžuhusa, vai bohccot bállejit ráfis leat, lohká Nils Peder I. Gaup vel loahpas.
