Kárášjoga gielda ja gieldda buollindoaimmahus čoahkkinastet odne, gieldda bealis sávvet boahtit ovttaoaivilvuhtii báikkálaš šiehtadusa dáfus.
Kárášjoga gielda ja gieldda buollindoaimmahus čoahkkinastet odne, gieldda bealis sávvet boahtit ovttaoaivilvuhtii báikkálaš šiehtadusa dáfus.
– Mis galgá čoahkkin buollindoaimmahusain 12 áigge odne, duođašta Kárášjoga gieldda teknihkalaš hoavda Trygve Nilsen.
Ikte čálii Ávvir ahte sotnabeaivvi rájes ii vuolgge Kárášjoga buollindoaimmahat šat čáskadit dola jus buollá, go leat cealkán eret báikkálaš sierrašiehtadusa Kárášjoga gielddain. Dát sierrašiehtadus regulere gearggusvuođaveaga bálká- ja bargodili buollin- ja gádjunbálvalusas.
Dán šiehtadusa mielde geatnegahttojit maid buollinčáskadeaddjit guoddit «caller-rusttega» man bokte ožžot dieđuid buollimiid dahje lihkohisvuođaid birra. Dál go Kárášjoga buollindoaimmahus lea eretcealkán šiehtadus de eai leat sii šat geatnegáhtton guoddit dán rusttega ja vuolgit dolaid čáskadit jus buollá.
Duhtameahttumat
Buollindoaimmahaga luohttámušolmmoš Kai Jøran Mienna muitalii ikte ahte sii oaivvildit báikkálaš šiehtadusas leat váilevašvuođat, ja ahte dovdet gielda njozet lágida áššiid, danne leat cealkán eret šiehtadusa.
Sii leat geahččalan oččodit ođastit šiehtadusa Kárášjoga gielddain jagi 2007 rájes, muhto eai leat vel ožžon.
– Dat lea prinsihpalaš ášši midjiide, ja jus ii buorrán dilli de vaikko árvvoštallat cealkit eret virggiid, ja dat gal gárta baicca divrrasin gildii jus 16 buollinčaskadeaddji heitet ja šaddet gávdnat earáid sin sadjái, lohká Mienna.
Sávvá njuolgat
Teknihkalaš hoavda muitala báikkálaš šiehtadusa digaštallot čoahkkimis.
– Mun duođaid sávan ahte áššit njulget dán čoahkkimis, lohká Nilsen, ii ge loga háliidit spekuleret mii dáhpáhuvvá viidásat jus eai šatta ovttaoaivilii buollindoaimmahusain.
– Muhto áššit gal lávejit njuolgat.
