-Almmuhus-
OĐĐASAT– Sávvá Stuorradikki čuovvolit

– Sávvá Stuorradikki čuovvolit

-

-

Carsten Smith rávvagiid vuođul bivdá Sámediggi vuođđolága rievdaduvvot. Ieš Smith sávvá Stuorradikki čuovvolit ášši, vaikke dievasčoahkkimis ii lean ge ollásit ovttaoaivilvuohta.

– Mun in leat Stuorradiggepolitihkkár, muhto lei hui čielga eanetlohku mii gáibida vuođđolága rievdaduvvot. Mun sávan ahte boađus šaddá mu smiehttamuša mielde, dadjá Smith.

 

Sámedikki dievasčoahkkin meannudii odne ášši mas dáhttot Stuorradikki rievdadit Vuođđolága paragráfa 108 sátnádeami, eanetlohku dáhttu maid vuođđolága jorgaluvvot sámegillii.

32 áirasa jienastedje gáibidit vuođđolága rievdaduvvot, viđas ges jienastedje vuostá. 

 

Smithain ráđđádallan

Dán áššis leat ráđđádallan ovddeš alimusrievtti justitariusain Carsten Smithain, ja su smiehttamuša vuođul dáhttu Sámediggi Stuorradikki rievdadit vuođđolága paragráfa 108.

– Mun lean álot oskon dasa ahte guovddáš sániin min vuođđolágas, lea stuorra mearkkašupmi olbmuid iešáddejupmái ja guhkit áigge ovdáneami stuorra liŋŋáide, dadjá Smith ieš.

 

Vuođđolága paragráfa 108 cealká nu mo dál lea:

«Lea stáhta eiseválddiid ovddasvástádus láhčit dili nu ahte sámi álbmotjoavku sáhttá sihkkarastit ja ovddidit gielas, kultuvrras ja servodateallimis»

 

Dien háliida Sámediggi rievdaduvvot nu ahte šattašii dákkárin:

«Lea stáhta eiseválddiid ovddasvástádus láhčit dili nu ahte sámi álbmot, riikka álgoálbmogin, sáhttá sihkkarastit ja ovddidit gielas, kultuvrras ja servodateallimis.»

-Almmuhus-