Eai buohkat vuosttal Deanosoahpamuša. Stággobivdi Tor Georg Næss lohká soahpamuš ii leat perfeakta, muhto sávvá ahte dohkkehuvvo.
Eai buohkat vuosttal Deanosoahpamuša. Stággobivdi Tor Georg Næss lohká soahpamuš ii leat perfeakta, muhto sávvá ahte dohkkehuvvo.
Kárášjohkalaš ja stággobivdi Tor Georg Næss sávvá Deanusoahpamuša dohkkehuvvot.
– Olbmot gal fertejit beassat bivdit, muhto gáržžideamit leat evttohuvvon vai luossa beassá bajit guovlluide čázádagas.
Suopma dohkkehan, Norggas ii mearridan
Stuoradikki Energiija- ja biraslávdegoddi lea duorastaga meannudan Deanusoahpamuša.
Lávdegoddi lea ávžžuhan Stuoradikki bivdit ođđa šiehtadallamiid Suomain. Stuoradiggi mearrida disdaga.
Suoma Riikkabeaivi lea juo dohkkehan šiehtadusa.
– Unnán luosat badjin
Næss lohká unnán luosaid beassat bajás, Kárášjohkii, Iešjohkii ja Anárjohkii. Danne lea su mielas buorre jus soahpamuš dohkkehuvvo.
Soahpamušas lea earret eará evttohuvvon maŋidit bivdoáiggi álggu golmmain vahkkuin.
– Dat livččii buorre, go dalle han eambbo luosat ollejit bajás. Soahpamuš ii šatta goasse nu ahte lea buorre buohkaide, muhto nu go dál lea, de gáhtte luossanáli, lohká Næss.
Son lohká maŋemuš jagiid leamaš ávcca unnán luosaid badjin.
– Luossabivdit Kárášjogas eai leat báljo goddán luosaid, johka lea leamaš measta guoros. Diibmá, go lei olu čáhci, ledje eambbo luosat, muhto maŋemuš áiggiid leat leamaš unnán luosat ná badjin. Jus kárášjohkalaš goddá logi luosa geasis, lea son buorre luossabivdi. Jus deatnulaš goddá logi luosa, de lea čuorbbes luossabivdi, lohká Næss.
Heajos ja buorit bealit
Son deattuha ahte su mielas ii leat soahpamuš dušše buorre, earret eará dat oassi go bartaeaiggádat ožžot bivdovuoigatvuođaid.
– Lea áibbas boastut addit vuoigatvuođaid bartaeaiggádiidda, dasa in leat mielas. Muhto lea buorre go bivdu gáržžiduvvo, sihke golgadeapmi, fierbmebivdu ja buođut. Leat heajos luossajagit leamaš, gáržžideamit leat buorrin luossanállái. Leat leamaš unnán luosat 2000-logu álggu rájes.
– Áitá stággobivdiid kultuvrra
Son reagere go dušše Deanu oaivilat gullojit medias.
– Min kárášjohkalaččaid oaivil ii oba gullo ge, dušše nubbi bealli. Deanus lea ealáhusbivdu, muhto ii ábut badjelmeare bivdit. Sin bivddu ferte maid ráddjet. Mii Kárášjogas fertet maid váldit oasi gáržžidemiin, lohká Næss.
– Min sáhttá measta gohčodit hobby-guollebivdin, go mii nagodit jur deavdit iežamet galmmihanbumbbáid. Maiddái mii, geat bivdit stákkuiguin ja johkafatnasiin bivdet, leat oassin johkasápmelaččaid kultuvrras. Badjelmeare bivdin sáhttá min kultuvrra áitit. Sámi kulturgáhttema ákkasteapmi ferte min maid gáhttet, lohká stággobivdi.
