-Almmuhus-
-Almmuhus-
OĐĐASATSávvá Ohcejoga-duomus leat váikkuhusat 

Sávvá Ohcejoga-duomus leat váikkuhusat 

-

-

– Gearretrievtti duopmu lea nu čielggas, ahte sáhttá adnojuvvot beanta oahppogirjin sámiid vuoigatvuođaid vuhtii váldimis, cealká Larsson Blind.

Sámiráđi presideanta Åsa Larsson Blind lea hui duhtavaš go Suoma Lappi Gearretriekti lea áššehuhttán sámi guollebivdiid, geat ledje áššáskuhtton lobihis bivddus ­Deanu oalgejogain Ohcejogas ja Veahčajogas.

– Vuorddán ahte Suoma eiseválddit váldet Lappi gearretrievtti duomu vuhtii, ja gudnejahttet sámiid vuoigatvuođaid geavahit kultuvrraset ja bivdit árbevirolaš vuogi mielde, cealká son preassadieđáhusas.

 

Sávvá atnet muittus duomu

Blind vuordá maid, ahte Suoma ráđđehus atná duomu muittus ovddos guvlui, vaikko lea gal ­vurdojuvvon ahte áššáskuhtti eiseváldi guoddala duomu Suoma ­Alimusriektái.

 

Njeaidá guolástansoahpamuša

Sámiráđđi čujuha preassadieđáhusas dasa go Gearretriekti cealká duomus ahte guolástanláhka, mii moadde jagi dás ovdal nuppástuht­tojuvvui, rihkku riikkaidgaskasaš olmmošvuoigatvuođaid soahpamušaid.

Duomus celko maid ahte guolás­teapmi gullá áššáskuhtton sápmelaččaid soga árbevieruide Veahčajogas, ja maiddái ahte Veahčajoga luossanáli gođđodilli lea stáđis.

 

– Ii dárbu bivdoráddjehusaide

Gearretriekti hilggui maiddái áššáskuhttima guollebivdi vuostá, gii Ohcejogas bivddii luossafirpmiin ráfáidahttináigge.

Lappi Gearretriekti cealká, ahte stáhtaráđi mearrádus oanidit luossa­bivddu Ohcejogas borgemánus, ráddje sámiid árbevirolaš fierpmebivddu, ja lea Suoma vuođđolága 17. paragráfa vuostá.

Gearretriekti cealká maid ahte Ohcejogas ii leat dárbu bivdo­ráddjehusaide borgemánus.

 

Gáibida árvvoštallat soahpamuša

Sámiráđđi fuomášuhttá ahte Lappi Gearretrievtti duomu mielde ­rihkkot bivdonjuolggadusat sihke Suoma Vuođđolága ja sámiid álgoálbmotvuoigatvuođaid.

– Ávžžuhan Suoma ráđđehusa lohkat duomu dárkilit, ja vuorddán ahte ráđđehus dál ođđasis ja vuđolaččat árvvoštallá Suoma ja Norgga gaskasaš Deanu soahpamuša, cealká Åsa Larsson Blind. 

-Almmuhus-