Ávvira oaggungilvu lea dál bistán vahkku, ja vuosttaš vuoiti lea Sara Mariell Anti, 10 jagi boaris.
Ávvira oaggungilvu lea dál bistán vahkku, ja vuosttaš vuoiti lea Sara Mariell Anti, 10 jagi boaris.
– Man somá lei vuoitit, illuda Sara Mariell Anti go gullá ahte Ávvir lea vuorbádan su oaggungilvvu vuosttaš vuoitin.
Son vuittii guvttiin dittiin maid gottii geassemánu 29. beaivvi. Son vuittii ge oaggunstákku ja Ávvir buffa.
Oaggungilvui sáhtát dáppe searvat.
Viššal oaggut
Sara Mariell lea viššal oaggut ja muitala leamaš olu áhči fárus oaggumin.
Son lei etniin biillas go Ávvir riŋgii, ja muitala sii ledje maŋemusat ikte oaggumin, muhto de ii goddon mihkkege.
– Moai áhčiin gottiime guvžžá maid dalle go leimme oaggungilvui searvan. Ovtta eará háve lei áhčči darvvehan nu stuorra luosa ahte fertii viehkalit ja mun fertejin maŋis boahtit viega hoavain.
Guolleságat
Sara Mariellas leat olu guolleságat ja muitala maiddái ahte vuossárgga áiggui fas áhčis fárrui oahppat buođđut.
– Sávan vuoitit fas dainna ođđa stákkuin! muitala Sara Mariell.
- Ávvira oaggungilvu bistá gitta borgemánu 5. beaivái diibmu 24.00 rádjái.
- Gilvvus leat guokte luohká, Luossagonagas dahje -dronnet, masa ollesolbmot sáhttet searvat luosaiguin. Váldovuoitu dán gilvvus lea 5000 ruvnno árvosaš skeaŋkakoarta, man vuorbádit buot oassálastiid gaskkas.
- Nubbi luohkká, Guollelihkku, lea fas mánáid várás. Váldovuoitu dás lea 1500 ruvnno árvosaš skeaŋkakoarta man vuorbádat buot oasseváldiid gaskkas.
- Dán luohkás vuorbádat maid oaggunstákku vahkkosaččat, sin gaskkas geat dan vahkkus leat oassálastán. Mannan vahkkus ii searvan oktage rávisolmmoš luohkkái, danne eat leat das vuorbádan vuoiti.
Ávvir sávvá Sara Mariell Anti ain olu guollelihkku ođđa oaggunstákkuin!
