-Almmuhus-
KULTUVRA– Sávan sámi álbmoga čuovvut mu mátkki

– Sávan sámi álbmoga čuovvut mu mátkki

-

-

Nu dadjá sámenieida guhte lávlu MGP finálas guovvamánu loahpas Oslos.

– Lea hui somá, lean super-gealdagasas ja illudan hui sákka ovdanbuktit lávlaga Norgga álbmogii, lohká Agnete Johnsen.

 

Rámis lávlagiin

MGP 2016 oasseváldit:

Dás oainnát buohkaid geat servet dán jagáš MGP-gilvvuide.

Suite 16 – «Anna Lee»

Stine Hole Ulla – «Traces»

Stage Dolls – «Into the Fire»

Elouiz – «History»

Freddy Kalas – «Happy Rush»

Makeda – «Stand Up»

Pegasus – «Anyway»

Laila Samuels – «Afterglow»

The Hungry Hearts featuring Lisa Dillan – «Laika»

Agnete – «Icebreaker»

Son lea okta dain 10 artisttas geat leat válljejuvvon dán jagáš Melodi Grand Prix (MGP) finálii, dáid gilvvuid vuoiti ovddasta Norgga Euorovision-gilvvuin giđđagease.

2016 MGP:s searvá Agnete lávlagiin «Icebreaker». Teavstta ja šuoŋa lea son čállán ieš, ovttasbarggus Gabriel Alaresiin ja Ian Curnowain. Curnow lea ovdalaččas ovttasbargan earret eará Rick Astleyain ja Kylie Minoguein.

– Lean hui rámis dáinna lávlagiin ja danne mearrideimmet sáddet lávlaga MGP:ii, ja dat han manai bures, čaibmá Agnete.

Son muitala lávlaga leat ođđaáigásaš pop-balladan.

– Dahje dat lea ainjuo eanet ballada go up-tempo lávlla, čaibmá ieš.

 

Persovnnalaš lávlla
Lávlaga lohká leat dan birra go muhtin lea lossa dilis.

– Lávlagiin háliidan movttiidahttit ja loktet olbmo guhte lea lossa dilis. Lávlla lea hui persovnnalaš ja mearkkaša munnje olu, čilge son.

MGP finála lea Oslo Spektrumas guovvamánu 27. beaivvi, ja ieš lohká illudit dása.

– Šaddá somá oaidnit mo hábmejit mu ovdanbuktima, šaddá somá oaidnit daid earáid ja šaddá hui somá leat mielde dán feasttas.

 

Gula oasáža su lávlagis dás:

(Ášši joatká dán vuolábealde, ođastahte siiddu jus lávlla ii čuodjagoađe)

 

 

Beaggán miehtá

Vaikke Agnete Kristin Johnsen ii leat go 22 jagi boaris, de lea son jo viidát beaggán guoimmuhansuorggis. Son šattai riikkabeakkánin jo 14-jahkásažžan go lávllui The BlackSheeps joavkkus, mii oassálasttii ja vuittii sihke norgga ja davviriikkalaš MGP junior gilvvu 2008:s. Vuoitolávlla «Oro Jaska Beana» oaččui Spellemannbálkkašumi buoremus hit-lávllan dien seamma jagi. Joavku searvvai maiddái MGP gilvvuin 2011:s, dalle gárte nuppi sadjái.

Maŋŋil The BlackSheeps-áiggi, lea Agnete oassálastán «Stjernekamp» gilvvus, gos gártta nubbin. 2014:s vuittii ges «Skal vi danse» gilvvu ja lea neaktán «Trollmannen fra Oz» musikalbihtá váldorolla Dorothy.

 

Vaikke nuorra nieida leage bures lihkostuvvan gilvvuiguin gos dán rádjai lea oassálastán de ii loga dan diehtit mo manaš dáid gilvvuin.

– Sávan olbmuid liikot lávlagii ja jienastit dan. Dat han lea olbmuid duohken ahte liikojit go dasa, muhto go searvvan dákkáriidda de lea álot mihttu birget nu bures go vejolaš ja bargat nu bures go sáhtán, lohká Agnete.

 

– Giittán din

Loahpas háliida Agnete vel giitit sámi álbmoga:

– Háliidan giitit din buot doarjaga ovddas man lehpet čájehan olles mu karriearaáiggis. Mun sávan dii ain joatkibehtet doarjut mu ja ahte čuovvubehtet mu dán mátkis. Giitosat sámi álbmogii!

 

MGP finála čájehuvvo njuolggosáddagis NRK1:s guovvamánu 27. beaivvi dán jagi.

 

 

 

-Almmuhus-