Dál almmuha Ávvir ođđa e-Aviissa. Doppe gávnnat buot báberáviissaid mat leat almmuhuvvon maŋimuš golmma jagis.
Dál almmuha Ávvir ođđa e-Aviissa. Doppe gávnnat buot báberáviissaid mat leat almmuhuvvon maŋimuš golmma jagis.
– Mii lea almmuhan ođđa e-Aviissa mas leat eanet funkšuvnnat go min ovddeš PDF-aviissas. Ođđa e-Aviissas leat buoret ohcanvejolašvuođat, buoret artihkalčájeheapmi, stuoridanvejolašvuođat leat buoriduvvon ja e-Aviissa vuolde lea maid digitála vuorká man vuolde gávdná Ávviriid mat leat almmuhuvvon 2013 rájes, rábmo Ávvira váldodoaimmaheaddji Kari Lisbeth Hermansen.
Sávvá šaddat buoret lohkanvásáhussan
e-Aviisa bálvalusa bokte besset lohkkit lohkat báberaviissaid interneahta bokte, dihtoriin dahje mátketelefuvnnain.
– Ođđa e-Aviissa lea álkit lohkat ja sávvat dieđusge ahte min lohkkit ožžot olu buoret lohkanvásáhusa go logadit ođđa e-Aviissa, lohká Hermansen.
Álki geavahit
Ávvira IT-ovddasvástideaddji Per Christian Biti dat lea bargan dáinna ođđa bálvalusain, ja son lohká leat álkin geavahit dán.
– Jus dus lea jo abbonnemeanta, de manat avvir.no neahttasiidui, bláđet gitta vulos dassážii go gávnnat «Ođđa geavaheaddji» liŋkka ja deaddilat dan. De gohččojuvvot deavdit iežat telefonnummara, jus dat ii doaimma, de ii soaitte mis du rivttes nummar. Dalle válddát oktavuođa min geavaheaddjeguovddážiin 934 40 700, ja mii de veahkehat du, lohká Biti.
e-Aviisa geavaha SPID-čovdosa, man olu eará aviissat maid geavahit.
Jus don leat jo SPID-geavaheaddji, de sáhtát dan geavahit lohkat Ávvira e-Aviissa.
– Jus Ávvira e-Aviisa ii doaimma albmaládje, de dasa sáhttet iešguđet sivat, ovdamearkka dihte soaitá boasttu telefonnummar dahje e-poastačujuhus registrerejuvvon min registariidda, čilge Biti ja ávžžuha olbmuid váldit oktavuođa geavaheaddjeguovddážiin jus vásihit váttisvuođaid.
Ođđa diŋgojeaddji-páhkat
Ođđa e-Aviissa almmuheami oktavuođas fállagoahtit maid ođđa diŋgojeaddji-páhkaid min lohkkiide: Kompleahttapáhkka ja digitálapáhka. Kompleahttapáhkas lea mielde báberaviisa ja e-Aviisa seamma haddái. Digitálapáhkas lea mielde e-Aviisa ja digitála vuorká.
– Sii geat dál juo dollet báberaviissa ožžot e-Aviissa, fertejit dušše ráhkadit geavaheaddji, čilge Biti.
– Ođđa diŋgojeaddji-páhkaiguin buoridit mii fálaldaga sidjiide geat juo diŋgojit Ávvira dahje háliidit diŋgogoahtit Ávvira. Dál besset min diŋgojeaddjit lohkat Ávvira báberaviissa gos máilmmis ležžat, seamma haddái. Lohkkiin lea maid vejolašvuohta válljet digitálapáhka, jus dusse e-Aviissa áigu lohkat, lasiha váldodoaimmaheaddji Kari Lisbeth Hermansen.
