Namma: Stine Ericsson Anti
Orrunbáiki: Guovdageaidnu
Bargu: Studeanta
Mii lea vuosttaš maid jurdilat go gulat sáni «juovllat»?
– Vuoiŋŋastit. Bearašáigi.
Mo ráhkkanat juovllaide?
– Ordnen skeaŋkkaid, basan ja čorgen, ozan juovlačiŋaid ja láibbun mánáin.
Man olu árvvoštalat iežat golahit juovlaskeaŋkkaide dán jagi?
– Dán jagi in leat geavahan nu olu. Min olbmot ožžot olu ruovttudahkkon skeaŋkkaid dán jagi.
Mo korona váikkuha du juovllaid?
– Ii váikkut rievtti mielde. Lean válljen ruovttus ávvudit juovllaid, in ge mana eatni lusa Levdnjii.
Maid sávat dán jagi juovlaskeaŋkan?
– Mus lea buot maid dárbbašan ja lean háliidan. Nu ahte dán jagi sávan ahte lean ceavzán buot eksámeniid, ja ahte beasan vuoiŋŋastit.
Mii lea du buoremus juovlamuitu?
– Mu buoremus juovlamuitu leat nuppi juovllat mánáin. De lei dan mađe sturron ahte sáhtiime láibut ja gáhkket, ráhkadit čiŋaid ja čiŋaheimme stobu.
