Eanas fitnodagaide Guovdageainnus ii leat duolva ja unnán čáhci dagahan nu stuora roasuid. Pitstop eaiggát Merethe Hætta gal lea ferten nuppelot miilla vuodjit čázi viežžat iežas fitnodahkii.
Eanas fitnodagaide Guovdageainnus ii leat duolva ja unnán čáhci dagahan nu stuora roasuid. Pitstop eaiggát Merethe Hætta gal lea ferten nuppelot miilla vuodjit čázi viežžat iežas fitnodahkii.
Guovdageainnu fitnodagaide ii leat nu olu váikkuhan go čáhceroassu lea gilis. Borranbáikki Pitstop eaiggát Merethe Hætta gal lea šaddan gitta Mázes vuojašit viežžat čázi.
Leamaš hehttehussan
Son šattai gitta dohko go borranbáikkis ferte dárkil leahkit, ja ii sáhte ovdamearkka dihte soapmása priváhta gáivus viežžat.
– Dat lea leamaš midjiide hehttehussan, dainna lágiin ahte lea liigebargu. Mun lean Mázes viežžan čázi, man leat biebmoráhkadeapmái atnán, lohká Hætta.
Sis manná oalle olu čáhci biebmoráhkadeapmái, ja Hætta muitala ahte sii leat seastán čázi lihttebassamis.
Basset gal mašiinnain, muhto go doidit galget, de eai geavat čázi, muhto gušttain ráhpot. Muđui eai leat váikkuhusat leamaš, go sii besset bassat vistti dainna čáziin.
(Ášši joatká gova vuolábealde)
Ráhkkanan giddet hotealla
Guovdageainnu Thon Hotel direktevra Knut Vidar Alseth muitala Ávvirii ahte sii ledje ráhkkanan giddet hotealla ovdal vahkkoloahpa.
– Mii gulaimet ahte soaitá nohkat čáhci, ja de leimmet ožžon dieđu ahte ferte giddet hotealla. Mii leimmet dasa ráhkkanan, ja álgán bussiid ordnet Áltái. Lihkus eat dárbbašan giddet, lohká Alseth.
Hoteallas leat ávžžuhan gussiid geavahit unnán čázi, muhto Alseht lohká ahte lea ráddjejuvvon olu sii sáhttet bargat, go olbmot han fertejit basadit ja earánastit.
Biepmu dáfus ledje čuđiid mielde littariid čázi vuoššan vai birgejit.
Dál sii jotket vuoššamis čázi ja ávžžuhit gussiid ain seastit čázi, dassážii go suohkanis ožžot eará dieđu.
Balle jus hotealla gidde
Maras pub ii ge leat vásihan nu olu váttisvuođaid, váikko doppe ledje stuora doalut mannan vahkkoloahpa.
– Áidna mii lei hástalus mis, lei go gulaimet ahte hotealla soaitá šaddat giddet, go min artisttat ja teknihkkárat galge orrut hoteallas. Lihkus eai gidden hotealla. Muđui mii leat oastán olu čázi, ja maiddái vuoššan čázi, lohká Maras pub beaivválaš jođiheaddji Aleksandar Nanchev. Son muitala ahte biebmoráhkadeamis sii eai geavat čázi, go visot lea gárvvis lágideaddjis go ožžot daid.
(Ášši joatká gova vuolábealde)
Gáfečázi váldán mielde
Frisørstua lea vuoktačuohpahat Guovdageainnu márkanbáikkis, ja fitnodaga eaiggát Marit Helene Eira ii loga čáhceroasu váikkuhan su fitnodahkii movt ge.
Son orru Mázes, ja lea váldán čázi Mázes mielde Guovdageidnui, mainna vuoššá gáfe.
– Kránas boahtá čáhci, ja dat lea nu ráinnas, dainna gal sáhttá bassat vuovttaid, lohká Eira.
Ávvir lea ožžon duođaštuvvot ahte Finnmark Rein lea ferten bissehit njuovvamiid Guovdageainnus čáhceroasu dihte, muhto eat leat ožžon ságaide su gii dan birra sáhtii muitalit.
