-Almmuhus-
OĐĐASATŠattai báhčit muosehis guossi

Šattai báhčit muosehis guossi

-

-

Molleš Pieras lea maŋimuš vahkku leamaš viehka muosehis guossi mii ráiggai sus čieža vistti. Loahpas šattai duottarstobueaiggát báhčit dan eret.

– Dat bođii die vahkku áigi ja ráiggai vuos ovtta vistti ja dan mun gal dohkkehin. Muhto beaivvis beaivái dat sirddašii visttis vistái ja gearggai ráigat čieža vistti mus. De in diehtán šat eará go báhčit dan eret, nu muitala Per Edvard Johnsen, dahje Molleš Piera guhte eaiggáduššá Vuolit Molleža duottarstobu.

 

Guossi, man birra hállá, diehttelasat ii leat olmmoš, muhto čáihni dahje dárogillii «hakkespett». Piera muitala gullan dán lotti leamašan Rágesluobbalis maid muosehuhttán muhtin bartaeaiggáda, muhto dát olmmoš gal lei nagodan dan gavdnjet eret.

– In dieđe mo leaš gal nagodan baldit dan eret, mun viggen maid ikte eahkes seavdnjadin baldalit dan lotti ja báhčen dan guvlui gos lei. Muhto dat bahákas, mii lei vahkku jo leamaš dás, lei lodjon iige ballan šat.

 

Nu de Johnsen gávnnahii buoremussan báhčit lotti.

– Mun báhčen dan ráiggi čađa maid ieš lei ráhkadan, ja diehttelasat go lei gárvves ráigi de ribahin ráigat vel robi, čaibmá son.

Molleš Piera lohká iežas nu dolkan gullat lotti:

– Dat han gullui čađat go čoalká.

 


LIVČČII GALGAN BÁHCINLOHPI: Čáihnit leat ráfáidahtton lottit ja ovdal go daid báhčá de ferte ožžon báhčinlobi. Liikká Per Edvard Johnsen ii bala dás šaddat váikkuhusaid.
Priváhtagovva: Per Edvard Johnsen

 

Lobiheapme

Muhto dát báhččin ii leat áibbas lobálaš, go čáihnit leat ráfáidahtton lottit ja ovdal go daid báhčá de ferte ohcat báhčinlobi.

– Mun in diehtán ahte leat ráfáidahtton lottit ovdal go ledjen jo báhččán dan, de gehččen interneahtas ja fuomášin dien. Ferten dál ohcat báhčinlobi. Ja jus ledje ovdal gihtii galgat ohcat lobi de lei dat loddi geargat illástit olles guovllu. Mus han leat vaikke man olu visttit dáppe, in ge mun sáhttán diktit dan ráigat daid visot, čilge Johnsen.

Son dattege ii bala gal dán báhčimis váikkuhusaid alcces:

– Dan in bala gal, maid hearráid dat dahká go ovtta čáihni báhčá. Gergen goittot dieinna hommáin ja mus lea dás dat čáihni, dieđe jo mo šattaš dál.

 

Noaidehommá

Molleš Piera ii loga diehtit manne loddi nie sirddašii visttis vistái ja ráiggai daid maid gearggai.

– Lávejit gal dološ olbmot lohkat ahte dat lea dakkár noaidehommá, muhto in mun duosta nu juste muitalit maid dat lohket mearkkašit. Bahá baldit buohkaid, čaibmá ieš.

 

-Almmuhus-