Deanu sátnejođiheaddji Helga Pedersen ja su kollegat Ohcejogas ja Kárášjogas oaivvildit ahte lea áigi rahpat riikkarájá Norgga ja Suoma gaskka.
– Lea fuolastupmi min, sátnejođiheddjiid, gaskka ahte guovddáš eiseválddiin lea nu unnán fuomášupmi davvirájáide, dadjá sátnejođiheaddji Helga Pedersen iFinnmark.no:i.
Gaskavahkku lei son vuosttaš geardde sátnejođiheaddjin deaivvadeamen kollegain Ilmari Tapiolain. Maiddái Kárášjoga sátnejođiheaddji Svein Atle Somby searvvai čoahkkimii, neahta bokte. Čoahkkima fáddá lei rájáid rahpan.
– Min mielas lea ártet go rádjá min riikkaid gaskka eai fuomášuhtto nu go Dánmárkku. Suomas lea unnán njoammun. Mii baicce ipmirdat manne ráđđehus vuordá rahpamis Ruoŧa rájá, gos lea ain olu njoammun ja olu jápmimat, dadjá Pedersen.
Golbma sátnejođiheaddji oaivvildit ahte lea boastut meannudit Ruoŧa, Suoma ja Islándda seamma dásis.
Oktasaš cealkámuš dan golmma sátnejođiheaddjis lea ahte giddejuvvon ráját leat garrasit váikkuhan olbmuid ja ealáhusaid gielddain. Sátnejođiheaddjit oaivvildit ahte ii leat govttolaš doalahit rájáid gitta go lea buorre dárkkistus koronadilálašvuođas, eaige leat ođđa njoammundáhpáhusat eai Norgga beale eaige Suoma beale rájá.
©NTB
