Kárášjoga sierralohpelávdegoddi attii Kárášjoga sátnejođiheaddjái Svein Atle Sombyi sierralobi vuodjit muohtaskohteriin gitta 2019 rádjái. Dan atná hui unohassan Nils Daniel Eikjok, go sutnje eai addán sierravuodjinlobi eará go dán jagi miessemánu njealját beaivvi rádjái, vaikke lei ohcan seamma sadjái vuodjinlobi go sátnejođiheaddji.
Kárášjoga sierralohpelávdegoddi attii Kárášjoga sátnejođiheaddjái Svein Atle Sombyi sierralobi vuodjit muohtaskohteriin gitta 2019 rádjái. Dan atná hui unohassan Nils Daniel Eikjok, go sutnje eai addán sierravuodjinlobi eará go dán jagi miessemánu njealját beaivvi rádjái, vaikke lei ohcan seamma sadjái vuodjinlobi go sátnejođiheaddji.
Kárášjoga gieldda sierralohpelávdegottis leamaš guokte čoahkkima, ođđajagemánu 21. beaivvi ja guovvamánu gávccát beaivvi. Olbmot geat ožžo sierralobi mohtorjohtolatlágas dálvevuodjimis ođđajagemánus, lea ožžon vuodjinlobi gitta jagi 2019 rádjái. Okta sis gii oaččui njealji jahkái vuodjinlobi skuhteriin lei ge sátnejođiheaddji Svein Atle Somby.
Govssahallan ohcci
Kárášjohkalaš Nils Daniel Eikjok ozai juste seamma sadjái ja seamma áigodahkii sierravuodjinlobi go sátnejođiheaddji, muhto sutnje gal biehttalii sierralohpelávdegoddi addit vuodjinlobi njealji jahkái. Dan atná Eikjok hui unohassan. Son lei ge ohcan justa seamma guvlui ja seamma lahtuide go Kárášjoga sátnejođiheaddji Somby. Áidna erohus lei ahte su sierralobi ohcan meannuduvvui bealgoalmmát vahkku maŋŋelis.
Govva: Astrid Helander
– Mun áiggun váidit čálalaččat ja jearrat manin mun in leat ožžon guhkkit go miessemánu njealját beaivvi rádjái 2016, inge 2019 rádjái nu mo ledjen ohcan. Go oaččun ákkastallama manin munnje lea addán dušše moadde mánu vuodjinlobi, de áiggun váidit gildii sii geat leat ožžon sierralobi vuodjit gitta miessemánu 2019 rádjái,
lohká Nils Daniel Eikjok, gean mielas ii leat dohkálaš go gieldda sierralohpelávdegoddi earuha olbmuid go ohcet lobi.
Sátnejođiheaddji mieđiha eahpevuoiggalaččat
Sátnejođiheaddji Svein Atle Somby ádde bures ahte dien mearrádusain ii leat vuoiggalašvuohta, go earret eará sutnje lea addon sierravuodjinlohpi njealji jahkái ja Eikjokii dušše miessemánu 4. beaivvi rádjái dan jagi. Kárášjoga sátnejođiheaddji lohká čielgasit:
– Diesa gal ferte gávdnat čovdosa. Sierralobit galget addojuvvot lága mielde. Jus leš nu ahte sierralobi ii galgga addot guhkkit go miessemánu njealját beaivvi 2016 rádjái, de lean mielas ahte mu sierralohpeohcan rievdaduvvo miessemánu njealját beaivvi 2016 rádjái.
Somby lohká son ferte hállat Kárášjoga gieldda sierralohpelávdegotti jođiheddjiin, Olav Sara Nikkinenain, gullat manin muhtumat ožžot eambbo go nuppit. Somby čilge dasto fertejit sii gielddastivrras geahččalit čoavdit ášši buoremus vuogi mielde, go ii leat dohkálaš olbmuid earuhit áššemeannudeamis.
Eahpevuoiggalašvuohta guoská olusiidda
Kárášjoga gieldda neahttasiiddus, poastalisttu vuolde, sáhttá oaidnit ahte dát eahperehálaš áššemeannudeapmi guoská buohkaide, geat leat ohcan sierralobivuodjima.
– Mun in lean vuosttaš čoahkkimis ođđajagemánus. Mun in dieđe man láhkai leat mearridan,
lohká lávdegotti jođiheaddji Olav Sara Nikkinen.
Mohtorjohtolat ii earut
Kárášjoga gieldda sierralobilávdegotti jođiheaddji Olav Sara Nikkinen čilge Finnmárkku Fylkamánni lea bajimuš hoavda ja mearrida mo sierralobi addin Mohtorjohtolatlágas galgá meannuduvvot.
Vuorkágovva: Astrid Helander
– Láhka ii atte dan vejolašvuođa addit sierralobi mohtorjohtolatlágas máŋgga jahkái. Lea boastut tulkojuvvon ovdal, in dieđe manin. Mii, lávdegoddi leat ságastallan dan birra guovvamánu čoahkkimis, lohká Nikkinen.
Nikkinen muitala sis lea Bargiidbellodagas árvalan addit sierralobi máŋgga jahkái ja lea bargagoahtán njulget njuolggadusaid áddejumi sierralobilávdegottis.
– Leamaš iešguđet lágan tulkojupmi lávdegottis ja boađus leamaš daid lahtuid duohken, joatká Nikkinen.
Váidit gildii
Nikkinen čilge ahte sii geat leat ožžon sierravuodjinlobi miessemánnui 2016, fertejit ohcat boahtte jagi.
– Sii geat leat ožžon sierralobi vuodjit 2019, eai dárbbaš ohcat, jus olbmot eai váidde gildii dán eahpevuoiggalašvuođa, manne lea diekkár erohus. Dalle ferte sierralobilávdegoddi loktet dan áššin, lohká Nikkinen.
Dalle sáhttá sierralobilávdegoddi meannudit ášši ođđasit.
– Buorre go boahtá dát meattáhus almmolašvuhtii,
joatká Nikkinen,
Gulahallanváttisvuođat
Kárášjoga gieldda sierralobilávdegottis lea golbma lahttu, jođiheaddji Olav Sara Nikkinen, lahttu Gunn Anita Anti Aslaksen ja Johan Samuel Nedrejord. Jođiheaddji Olav Sara Nikkinen muitala lávdegottis lea gulahallanváttisvuođat maid berrešii čorget eret ja njulget áššiid, ja čilge son šaddá uhcitlohkui duon guoktá ektui.
Sierralobilávdegottelahtu Gunn Anita Anti Aslaksen biehttala searvat jearahallamii ja vástidit Sara Nikkinen moaitámušaid.
– In. Mun in kommentere mediai. In,
logai Gunn Anita Anti Aslaksen go Ávvir bivdii su kommenteret ášši.
– Galggašii njulget
Kárášjoga gieldda mohtorjohtolatlága sierralobilávdegotti nubbi lahttu, Olgešbellodaga Johan Samuel Nedrejord mielas ii leat ártet jus olbmot cuigot go muhtumat leat ožžon muohtaskohtervuodjinlobi gitta 2019 rádjái ja earát dušše dán jahkái.
– Orru várra ártet olbmuide go nie lea šaddan. Vuosttaš čoahkkimis ii lean jođiheaddji Olav Sara Nikkinen mielde, muhto su várrelahttu Marie Therese Nordsletta Aslaksen, ja dalle ožžo buohkat sierralobi gitta 2019 rádjái. Nuppi čoahkkimis gulahalaimet buorebut, ja dalle ožžo buohkat sierralobi dán jagi miessemánu 4. beaivái, iige 2019:i. Galggašii njulget vai buohkat ožžot dan seamma lobi seamma áigái, lohká Johan Samuel Nedrejord.
Nedrejord dadjá iežas ovttaoaivilis sierralobilávdegotti jođiheddjiin, Olav Sara Nikkineniin, ahte sii fertejit gulahallat buorebut vai sin lávdegoddi doaimmašii eavttuid mielde.
Lohpi olles válgaáigodahkii
Sierralobilávdegotti lahttu Johan Samuel Nedrejord ii oainne makkárge váttisvuođa addit sierralobi olbmuide olles válgaáigodaga, gitta 2019:i, nu mo lea ovdal lea dahkon. Lohká Finnmárkku fylkkamánni han sáhttá rohttet ruovttoluotta dan sierralobi jus ii dohkket ahte sii leat addán sierralobi gitta 2019:i.
– Mu mielas gal lea vuohkkasamos addit sierralobi olles válgaáigodahkii, go dat geahpeda min barggu, lohká Johan Samuel Nedrejord.
Son muitala Kárášjoga gieldda mohtorjohtolatlága sierralobilávdegoddi čoahkkinastá fas njukčamánu álggus.
Govva: Astrid Helander
Ii kommentere
– Mun in dovdda ášši, in ge sáhte maidege áššái jienádit. Jus dispalávdegotti mearrádusat váidaluvvojit, de lea maid boastut mus daid kommenteret, vástida Finnmárkku fylkkamánni Gunnar Kjønnøy Ávvirii SMS bokte.
