Guovdageainnu sátnejođiheaddji, Hans Isak Olsenis, lea ávžžuhus sidjiide geat bohtet ruoktot juovllaide.
Sátnejođiheaddji, Hans Isak Olsen, dieđiha Guovdageainnu suohkana neahttasiiddu bokte ahte son sávvá olbmuide buresboahtima ruoktot juovllaide, ja muittuha njoammunsuddjenrávvagiid.
– Boađe áinnas ruoktot juovllaide, muhto leage várrogas ja dihtomielalaš njoammunsuddjema rávvagiid hárrái, čállá Guovdageainnu sátnejođiheaddji.
Son muittuha earret eará doallat mehtera gaskka earáide, bassat gieđaid bures ja ii guossástallat jus leat nuorvodávdamearkkat.
– Vállje dárkilit geaid lahka leat, ja jurddašala bures movt ovttastalat bearrašiin ja ustibiiguin.
Muđui dieđiha ahte dán vahkku eai lean dieđihuvvon ođđa covid-19 dáhpáhusat Guovdageainnus.
