Stáhta dearvvašvuođabearráigeahčču oaččui vuossárgga dieđu Davvi spesialistadearvvašvuođa- ja gielddadearvvašvuođabálvalusas, Helse Nord, ja stáhtahálddašeddjiin Nordlánddas, Romssas ja Finnmárkkus, Davvi Norgga dearvvašvuođa dilálašvuođa birra.
Pressadieđáhusas čállá stáhtahálddašeaddji ahte dás ovddasguvlui boahtá leat nanu ságastallan Davvi stáhtahálddašeddjiid ja stáhta dearvvašvuođabearráigeahčču gaskkas. Rapportat bohtet leat bienalaččat ja konkrehtat das movt dearvvašvuođa dilálašvuohta lea ja movt dat ovdána. Sii bohtet maid doallat eambbo čoahkkimiid dearvvašvuođabearráigeahčuin jus orro dárbbašlaš.
– Mii álggaheimmet dán vai sihkkarastit ahte dearvvašvuođabearráigeahčču oažžu buot dieđuid maid dárbbašit sin gulahallamis dearvvašvuođa eiseváldiin, man sii orrot dál ožžon, dadjá Romssa ja Finnmárkku stáhtahálddašeaddji, Elisabeth Vik Aspaker, preassadieđáhusas.
Stáhtahálddašeaddji váldá dán duođalažžan go davvin dál eai leat realisttalaš molssaevttolaš fievrridanvejolašvuođat pasieanttaide ja dehálaš dearvvašvuođabargiide.
Váttis logistihkka
Dearvvašvuođabálvalusain pasienttaid ja bargiid fievrredeami ektui, lea guhká leamaš váttis dilálašvuohta čoavdit.
– Mii vásihat ja oaidnit ahte sihke spesialista- ja gielddadearvvašvuođabálvalusat beroštit ja ohcet buoremus čovdosiid pasieanttaide ja bargiide dán váttis dilis, dadje Aspaker preassadieđáhusas.
