15 beaivvi bargoheaitta maŋŋel leat SAS ja pilohtasearvvit šaddan ovtta oaivilii. Bargoheaitta lea dál nohkan, ja pilohtat galget ruovttoluotta bargui.
– Dál leat mii ovtta oaivilis. Bargoheaitta lea nohkan. Mii boahtit bargagoahtit fas ihttin, dieđihii Martin Lindgren Ruoŧa pilohtasearvvis preassaide diibmu 03:20 maŋŋebárgga čuovganeapmái.
Son ja SAS šiehtadallanjođiheaddji, Marianne Hernæs, bođiiga fárrolaga muitalit ođđasa olggobeale Näringslivets Hus Stockholmas, gos leat šiehtadallan guhtta beaivvi.
– Leat maŋŋel guhkes, garra šiehtadallamiin viimmat ožžon šiehtadusa, jotkkii Lindgren.
– Lean movtta go viimmat beassat mannat eret dáppe vuolláičállojuvvon šiehtadusain. Lean movtta mielčuovvuid bealis go ihttin álgit girdit fas, dajai Hernæs.
Sullii 900 pilohta Norggas, Ruoŧas ja Dánmárkkus leat leamašan bargoheaitagis suoidnemánu 4. beaivvi rájes.
