Ihttin disdaga álgá diggeášši gaskal Sárevuomi ja Norgga stáda, masa gullet Eanandoallo- ja biebmodepartemeantta ja Statskog. Diggeášši lea Hålogalándda lágamánnerievttis Romssas. Dan čállá Sameradion & SVT Sápmi.
Dát Norgga beale eatnamat mas lea sáhka, leat Álddesjávrris Sis-Romssas. Sárevuomi čearru gáibida okto beassat geavahit sin árbevirolaš dálve- ja geasseguohtumiid.
Dál čearus lea lohpi geavahit dáid árbevirolaš guohtuneatnamiid Norgga bealde dušše geasset, miessemánu 1. beaivvis gitta čakčamánu 14. beaivái.
Korona dili dihte bohtet guokte čearu miellahtu searvat ja vihtanat leahkit mielde neahta bakte.
