Ikte lei maŋemus čiekčan Sápmi joavkkus Western Armenia vuostá ja loahppaboađus šattai 3-0 FA Sápmái.
Čieža beaivvi lea FA Sápmi leamašan Georgias spábbačiekčangilvvuin ja ikte lei maŋemus plasserenčiekčan. Sápmi šattai loahpalaččat viđádin go vuite dan guokte maŋemus čiekčama bearjadaga ja lávvordaga. FA Sápmi šadde čiekčat plasserenčiekčamiid 5.-8. sajiid gaskkas.
Ievttá čiekčamiin čikče Alexander Ellingsen, Tom Karlsen, Jarkko Lahdenmäki, Per Jon Huuva, Jirijoonas Kanth, Stein Arne Mannsverk, Samuli Laitila, Jon Steinar Eriksen, Johan Bergkvist, Jörgen Jerijervi ja Erik Bertelsen Sámi riikajoavkku ovddas.
Jon Steinar Eriksen deaivvai vuosttaš moala, Samuli Laitila nuppi moala ja Stein Arne Mannsverk goalmmát moala, čállá FA Sápmi Facebooksiiddus. FA Sápmi lea čiekčan vihtta čiekčama gilvvuin.
