Nuorra englándalaš studeanta oaidná Sámi čielga kandidáhttan buot máilmmi álgoálbmogiin ráhkadit sierra riika. Borgemánus son boahtá Sápmái dutkat dan vejolašvuođa.
Nuorra englándalaš studeanta oaidná Sámi čielga kandidáhttan buot máilmmi álgoálbmogiin ráhkadit sierra riika. Borgemánus son boahtá Sápmái dutkat dan vejolašvuođa.
Ágga manne Ryan Grimes áigu dán dutkat lea go son lei New Zealánddas, gos son oinnii Maori álgoálbmoga dili, gos sii leat álgán eallit ođđaáigásaš vuogi mielde, ja massán sin kultuvrra oalát.
Son lohká njuolgut ahte Maori álbmot leat olgguštuvvon, ja vajálduvvon stuora servodagas.
– Dasto leat sápmelaččat, sii leat nagodan ođđa vugiid fátmmastit, muhto sis lea ain garra kultuvrralaš dovdu. Sámit leat Eurohpás birgen, ja ain birgejit.
Dat lea manne Grimes oaidná Sámi čielga kandidáhttan buot máilmmi álgoálbmogiin ráhkadit sierra riika.
Guokte mánu dutkat
Ryan Grimes lea 22 jahkásaš, englándalaš, ja geografiijastudeanta Canterbury Christ Church Universitehtas Dover gávpogis.
Son lea boahtime Sápmái borgemánus dán jagi, ja galgá guokte mánu dáppe čoaggit dieđuid iežas dutkamii.
Háliidit go sierra riika
Dál son lea easka álggaheame dutkanbarggu, ja lohka ahte vuosttažettiin son ferte gávnnahit movt sápmelaččat ieža jurddašit, ja háliidit go dán oba ge.
– Jus eai hálit, de gal ii leat ávki mus dan dutkat.
Govven: Sárá Máret Rávdná Oskal
Ii mielas
Sámedikki dievasčoahkkinjođiheaddji Jørn Are Gaski (Bargiidbellodat) ii liiko dan ođđasii ahte dát galgá dutkojuvvot.
– Dál oažžut mii sámepolitihkkárat gulahallanváttisvuođaid, go dál mii šaddat fas ođđasit álgit čilget ahte mii eat hálit sierra riika. Dál šaddat fas álgit dasa bidjat áiggi, lohka son.
Ii sierra stáhta
Gaski jáhkká ahte dutki boahtá gávdnat ahte sápmelaččain ii leat beroštupmi sierra riikii.
– Váikko leat olbmot geat eai leat duhtavaččat, ovdamearkka dihte dáruiduhttinpolitihkain, de gal ii leat okta ge gii gáibida iežas stáhta dan dihte, lohka son.
Ártegis dutkan
Son lohká sámedikkis lea doarvái váikkuheapmi ahte beassá mearridit.
– Gal dat dutket olu ártegis áššiid, loahpaha vel Gaski.
Son lohká baicca galgat bargat oažžut buoret váikkuhanvejolašvuođa sámiide alcceseaset nu ahte nannet ja ovdánahttit sámegiela, kultuvrra ja birrasa, ja oadjebas boahtteáiggi olihit. Dat lea áibbas eará go jurddašit sierra sámi stáhta.
Govven: Sara Maret Ravdna Oskal
Buorrin Sápmái
Vaikke Gaski ja Bargiidbellodaga mielas ii leat buorre ođas, de lea Sámedikki doaibmi presideanta Thomas Åhren (NSR), veahá eará oainnus.
Son lohká miellagiddevaš čuolmma Ryan Grimes dutkamis, muhto ahte dát ii leat dakkár fáddá mii lea Sámedikkis áššin.
– Buot dutkamat sámiid birra mat leat ja mat bohtet, mat dagahit ahte sápmelaččat sáhttet oažžut eambbo iešmearridanvuoigatvuođa ja iešstivrejumi, leat buorit, lohka son.
Eambbo iešstivrejumi
Åhren lea ovtta diŋgii áibbas čielggas:
– Dan maid mii áigut lea eambbo iešstivrejumi, lohká son.
Åhren ii jáhke gal ahte lea áigumuš sierra stáhtii sámis.
