-Almmuhus-
OĐĐASATSápmi Pride lea almmuhan prográmma

Sápmi Pride lea almmuhan prográmma

-

-

Guovtti vahkku geahčen lágiduvvo Sápmi Pride Guovdageainnus, ja lágideaddjit leat oanehis áiggis ceggen prográmma maŋŋel go mearriduvvui ahte doalut sirdojuvvojit Anáris Guovdageidnui.

Sápmi Pride sirdojuvvuige Guovdageidnui maŋŋel go searvegodderáđđi mearridii gieldit vihahit olbmuid seamma sohkabealis girkus.

 

Vázzin ja girkostallan

Sápmi Pride bovde gili olbmuid ja gussiid dievas kulturprográmmii, mas lea earret eará poesiija bargobádji, digaštallamat ja konsearttat Duolva Duoddariin ja Elle Márjá Eirrain.

Dieđusge lea Pride ráidu mas vázzit márkanbáikki čađa lávvordaga. Mii galgat maiddái oassálastit ipmilbálvalusas girkus sotnabeaivvi, ja sávvat nu ollugiid go sáhttet vuolgit dohko min fárrui, lohká Sápmi Pride prošeaktajođiheaddji Dávvet Bruun-Solbakk.

 

Háliidedje čuojahit

Bruun-Solbakkii lea erenoamáš illudahttin go báikkálaš biras lea čájehan nu stuora beroštumi doaluide.

– Lea máilmmi somá go Duolva Duottar almmuha ođđa musihka ja dollet konseartta Sápmi Pride oktavuođas. Sihke sis, Elle Márjá Eiras ja Dj Šielain lea gullevašvuohta Guovdageidnui, ja sii duođas háliidedje čuojahit doaluin, muitala prošeaktajođiheaddji.

 

Buot nuvttá

Son maid gudnejahttá Thon Hotealla mii lea dorjon ruđalaččat, ja Sámi allaskuvlla guhte luoiká lanjaid sihke bargobádjái ja digaštallamii.

– Guovdageaidnu lea hábmen máŋga áŋggirdeaddji geat áŋgiruššet dásseárvui ja čájehit váibmoláđisvuođa, lohká Bruun-Solbakk. Son muitala buot Sápmi Pride kulturdoalut leat nuvttá, maiddái konsearta Thon hoteallas.

Dál lea vel guokte vahkku doaluide, ja Bruun-Solbakk sávvá nu ollugiid go vejolaš boahtit Guovdageidnui.

 – Mii leat ain láhčime dili guhkilmas gussiide, ja buohkat, geat leat vuolgime Guovdageidnui, sáhttet váldit oktavuođa minguin, erenoamážit jus biillain bohtet ja sáhttet eambbosiid váldit fárrui, čállá son preassadieđus ja lasiha vel ahte dárbbašit maid eaktodáhtolaš bargiid doaluide.

 

 

 

-Almmuhus-