Sámediggepresideanta Aili Keskitalo searvá ihttin «Jikŋon 2» filmma nationála ávvupremierii Colosseum kinos Oslos.
Lávvordaga juovlamánu 14. beaivvi lea «Jikŋon 2» filmma almmolaš ovdapremiere Norggas. Davvisámegielat veršuvdna «Frost 2» filmmas lea njuolggoboađus Norgga, Ruoŧa ja Suoma sámedikkiid, Sámeráđi ja Walt Disney Animation Studios buori ovttasbarggus. Sápmelaččaid bealis lea leamaš dehálaš sihkkarastit ahte sámi kultuvra, mas filbma lea viežžan inspirašuvnna, meannuduvvo gudnejahttimiin ja dohkkehemiin, čállá Sámediggi preassadieđáhusastis.
Bileahtat vuvdon
Davvisámegiel veršuvdna čájehuvvo máŋgga kinos olles riikkas dán vahkkoloahpa, nu go ovdamearkka dihte Troanddimis, Plassjes, Romssas ja Leavnnjas. Máŋgga sajis, nu go Álttás ja Čáhcesullos, vuvde buot bileahtaid davvisámegiel čájeheapmái dušše moadde diimmu maŋŋel go ledje vuovdigoahtán daid.
– Lea hui somá go sámegiel čájehemiin leat bileahtat buot vuvdojuvvon nu máŋgga sajis, muhtin sajiin maiddái ovdalii Norgga veršuvnna. Dat čájeha ahte lea márkan sámi filbmii kinos, dadjá sámediggepresideanta Aili Keskitalo.
Feastavuoigŋa kinoin
Máŋga sámediggeáirasa, sámi artistta, neavttára ja dáiddára, geat leat leamaš mielde filmmas, leat ávvopremiearas Oslos. Sámedikki direktevra Rune Fjellheim, gii lea leamaš sámedikkiid ja Sámeráđi oktavuođaolmmoš Disney Animationiin, lea maid searvame ruksesrátnu-premiearas oaivegávpogis.
Sámedikki iráđđelahtut servet juovlamánu 14. beaivvi ovdapremierii dáin báikkiin:
Sámediggeráđđi Berit Marie E. Eira lea Guovdageainnus, Henrik Olsen Romssas , Mikkel Eskil Mikkelsen Bådådjos ja juovlamánu 15. beaivvi searvá Silje Karine Muotka Čáhcesullos. Šaddet iešguđet doaimmat iešguđet kinoin, rukses ránuin, spáidariiguin, guoimmuhemiin ja vuoittuiguin.
Vuordá eanet stuora filmmaid sámegillii
Sámediggepresideanta Aili Keskitalo lea juo oaidnán filmma Amerihká veršuvnna go «Frozen 2» čájehuvvui vuosttaš geardde Hollywoodas mánu áigi, muhto son illuda erenoamážit oaidnit sámegiel veršuvnna.
– Šaddá hui dovdduide čuohcci vásáhus oaidnit dán stuora filmma davvisámegillii, ja njuorasmahttá mu jurddašit ahte sámi mánát besset oaidnit iežaset sáŋgáriid hupmame davvisámegiela kinošearpmas. Seammás lea veahá bahča illu dan dihte go livččen háliidan ahte buot sámi mánát olles Sámis livčče galgan oažžut vejolašvuođa oaidnit filmma iežaset gillii. Jáhkán liikká ahte dát lea dušše álgu ja ahte mii beassat vásihit oaidnit eanet stuora filmmaid maiddái eará sámi gielaide dađi mielde, dadjá presideanta.
Stockholmas, Ruoŧas, lea nationála ovdapremieara sotnabeaivvi juovlamánu 15. beaivvi ja Helssegis, Suomas, lea nationála ovdapremieara mánnodaga juovlamánu 16. beaivvi. Sámegielat veršuvdna čájehuvvo de oktanaga nationála gielat filmmaiguin. Sámegiel veršuvdna tekstejuvvo nationála gielaide.
