Girjjis «Joikeforbudet i Kautokeino» boahtá ovdan ahte ledje sápmelaččat ieža skuvlastivrras geat gilde skuvlamánáid juoigama.
Girjjis «Joikeforbudet i Kautokeino» boahtá ovdan ahte ledje sápmelaččat ieža skuvlastivrras geat gilde skuvlamánáid juoigama.
Girji mii ilmmai gaskavahku, mas lea namma «Joikeforbudet i Kautokeino», dahje «juoigangielddus Guovdageainnus», lea dutkkus man Norgga árktalaš universitehta konserváhtor, Ola Graff, lea dahkan.
Dutkanbarggu son de ráhkadii girjin ja man Davvi Girji dál lea almmuhan.
Amas dieđut
Girjji birra muitalii Graff Diehtosiiddas, Guovdageainnus, ja doppe bohte dieđut ovdan mat eai lean gullon gostege ovdal. Ii leat okta ge ovdal čohkken dieđuid dan birra, nu go Graff dál lea dahkan.
Lei vissa máŋgasii hui amas go Guovdageainnu skuvlastivra lea njeallje geardde meannudan juoigama Guovdageainnu skuvllain, ja doalahan juoigangildosa 1953 rájes.
Sámit ieža duogážis
Girjjis boahtá ovdan ahte skuvlastivra lea meannudan dan vuosttaš geardde 1953:s, ja dalle ledje gávccis stivrras, vihtta sápmelačča ja golbma dáčča.
Dat vihtta sápmelačča jienastedje nu ahte eai galgga juoigat skuvllas, ja dat golbma dáčča gal livčče miehtan ahte juoigan galgá dohkkehuvvot skuvllas.
Hirpmáhuhtii
Graff ieš muitala ahte su ii hirpmáhuhttán dat go sámit ieža manne vuostá juoigama skuvllas.
– Mu veahá hirpmáhuhtii go olles njeallje geardde meannudedje juoigangildosa, ja nannejedje dušše juohke háve dan gildosa, lohká son.
Govven: Nils Johan Vars
Ii váikkuhan
Julie Eira lei álggos Guovdageainnu skuvllaid oahpaheaddji ja maŋŋel rektor, ja loahpas skuvlahoavda.
– Juo, mun ledjen skuvllas dalle barggus. In muitte gal lei go beare váttis go ii lean lohpi.
–Jáhkán mii eat jurddahan dan birra nu olu. Lei gal ahte šadden, go ledjen hoavda, muhtumin gieđahallat dan juoigama. Lávejin dušše dadjat ahte gulahallat váhnemiiguin, ja nie ain, muitala Eira.
Sámegillii
Girji, man Davvi Girji almmuhii, ii leat sámegillii. Lágádusjođiheaddji Jan Helge Soleng muitala ahte lea Ola Graff dutkanbargu, ja dat lea čállon dárogillii.
– Midjiide livččii gártan máksit 200 000 ruvnno jorgalit girjji sámegillii, muitala son.
Son ii lohpit ahte dát girji galgá sámegillii jorgaluvvot juste dan geažil, son bidjá ášši viidásit Sámediggái.
– Mu mielas livččii dehálaš ahte Sámedikkis livččii sierra ruhta mii galgá adnot sámi girjjiid jorgalit sámegillii. In oaivvil visot dárogiel girjjiid jorgaleapmái, muhto sámi girjjiid mat leat dárogillii čállon, lohká son.
