Sápmelaččat leat olu váivviid čađa mannan, muhto 100-jagi ávvudeamis čalmmustahttet buot buriid maid sámit leat olahan.
Sápmelaččat leat olu váivviid čađa mannan, muhto 100-jagi ávvudeamis čalmmustahttet buot buriid maid sámit leat olahan.
Boahtte jahki lea sápmelaččaid ávvujahki. Leat gollan 100 jagi dan rájes go sápmelaččaid vuosttaš riikkačoahkkin lágiduvvui Troanddimis.
Seamma gávpogii čoahkkanit fas sápmelaččat guovvamánus, olles vahkku galget iežaset ávvudit.
– Sámit bohtet dál maid buot njealji riikkas, dasa lassin leat bovden olu gussiid, lohká Tråante 2017 gulahallanovddasvástideaddji Johanne Sundby.
Almmolaš guossit
Tråante 2017 doalut leat guovtti oasis. Miehtá Sámi lágiduvvojit boahtte jagi doalut mat čalmmustahttet 100-jagi ávvudeami, ja Troanddimis leat doalut guovvamánu 5.-12. beaivái.
Lágideaddjit muitalit ahte doaluide bohtet maiddái almmolaš guossit.
– Mii leat bovden gonagaslaččaid maid, dadjá Sundby gii ii háliit vel muitalit maid gonagasviesus leat vástidan bovdehussii.
Áŋgiruššan ja sáhkkiivuohta
Tråante 2017 prošeaktajoavku lea galledan Kárášjoga.
Sii leat čoahkkinastán Sámedikkiin ja deaivvadan báikkálaččaiguin.
– Mii bovdiimet olbmuid diehtojuohkinčoahkkimii gosa sullii 20 olbmo čoahkkanedje. Mii gal leat hirbmat duđavačča. Olbmot čájehit sáhkkiivuođa ja sii áŋgiruššet. Čoahkkin lea hui ávkkálaš min bargui plánet ja čađahit doaluid, muitala Sundby.
Girjás prográmma
Ávvudoaluin lea girjás prográmma. Troanddimis lágiduvvojit olu politihkalaš čoahkkimat, muhto kulturdoaluide lea várrejuvvon olu sadji.
Sii fállet sihke teáhterčájálmasaid, konsearttaid ja girkostallamiid. Maiddái valáštallamii lea láhččon sadji ja guovdu Troanddima galget maid doalut.
– Mii leat olu jo plánen, muhto prográmma ii leat vel dievaslaš. Mii illudat sákka ávvudeapmái, lohká gulahallanovddasvástideaddji.
Sirdet doaluid
Olu gávpogiin ja báikkiin Norggas lágidit Sámi Álbmotbeaivvi oktavuođas Sámi vahkku.
Tråante 2017 lágiduvvo maid seamma áigodagas, muhto lágideaddjit muitalit ahte dát ii šatta nu stuora váttisvuohtan.
– Máŋgga báikkis leat sirdán doaluid nu ahte eai lágiduvvo oktanaga Tråante ávvudoaluin. Tråante 2017 han lea buot sámiid várás, ja danin leat eará lágideaddjit gulahallan minguin, dadjá Sundby.
Illudit ja čevllohallat
Vaikke sápmelaččat leat olahan viehka olu vuosttaš riikkačoahkkima rájes, de leat maiddái seavdnjadat bealit sámiid historjjás.
– Sámit leat badjelgehččojuvvon ja leat vásihan olu bákčasiid. Ávvudoaluin dattege háliidat čalmmustahttit ilu, mii háliidat ahte sámit galget čevllohallat go leat olu buriid ollašuhttán 100 jagis, dadjá Tråante 2017 gulahallanovddasvástideaddji Johanne Sundby.
Árvvusatnigohtet sámiid
Go ávvudit 100 jagi, de leat sámit bures oidnosis miehtá Troanddima gávpoga.
Sundby jáhkká gávpotássiid váldit sápmelaččaid bures vuostá.
– Troanddimis lea sámevuohta dađibahábut hui amas, muhto mun jáhkkán ávvudoaluid boktit olbmuid sáhkkiivuođa. Doaivumis ohppet eanet sámi kultuvrra ja historjjá birra. Ávvudoaluid dihte soitet maiddái olbmot eanet árvvusatnigoahtit sámiid, loahpaha son.
