- Nannejehket solidaritehtaoasi sámi riikkaidgaskasaš barggus! Dát lea Sámi girkoráđi čielga diehtu Sámediggái.
Sámedikki dieđáhus sámi riikkaidgaskasaš barggu hárrái lei váldoášši go Sámi girkoráđđi dán vahkus lei čoahkkanan ráđđečoahkkimii Girkonjárgii. Sámi girkoráđđi lea duđavaš dainna man guvlui Sámedikki čielggadus čujuha.
– Sámedikkeráđđi ánssáža rámi go čujuhit sápmelaččaid solidaralaš ovddasvástádussii eará álgoálbmogiidda, muhto mii doaivut ahte solidaritehtabealli šaddá vel čielgaseappo Sámedikki loahpalaš dieđáhusas, dadjá Sámi girkoráđi jođiheaddji Anne Dalheim kirken.no siiddus.
Ealáhusafitnodagain ovddasvástádus
Sámediggeráđđi lea čielggadusastis sámi riikkaidgaskasaš barggu birra namahan makkár hástalusat ealáhusfitnodagain leat go galget ávkkástallat Sámi ja Arktisa luonduriggodagaiguin. Sámi girkoráđđi deattuha ahte dát lea maiddái máilmmeviidosaš hástalus maid Sámediggi berre muittuhit norgalaš fitnodagaide.
– Stáhta penšuvdnafoanda lea máilmme stuorimus investerenfoanda, ja norgalaš fitnodagat doibmet álgoálbmotguovlluin eará máilmmeosiin. Danin Sámi girkoráđđi ávžžuha Sámedikki árvvoštallat makkár oassi Sámedikkis ja sámi servvodagas berre leat dán oktavuođas, ja mo dan oasi sáhttá nannet ja ovdánahttit solidaritehta oktavuođas, dadjá Anne Dalheim kirken.no:ii.
Bivdet lahčit dili
Sámi girkoráđđi ávžžuha maiddái Sámedikki láhčit dili nu ahte sámi servvodat oppalaččat sihke sáhttá Sámedikkiin ovttas bargat ja Sámedikki hástalit sámi riikkaidgaskasaš barggu ovdánahttimis.
– Sámi servvodahkii lea dearvvaslaš ahte Sámedikki čielga sajádat oažžu vuostebeali siviila sámi servvodagas mas lea beroštupmi ja solidaralaš vuođđojurdda, daddjo Sámi girkoráđi mearrádusas.
