Suoma turistta Marcus Kumpulainen mielas ii ovddit báhččojuvvon diehtojuohkingalba Kárášjoga gieldda oppanassii ge. Lohká báhcá imaštit makkár sápmelaččat dán guovllus ásset ja makkár oktavuohta lea sámi ja Norgga kultuvrra gaskka.
Suoma turista Marcus Kumpulainen imašta manin Kárášjoga diehtojuohkingalba E6 geaidnoguoras guhtta kilomehtera Leavnnja guvlui, lea suokkisin báhččon.
– Imaštan go diehtojuohkingalbba lea stuorra bissuiguin báhčán ráiggil. Mu mielas lea heahpat go dákkár diehtojuohkingalba lea ovdalaš čoahkkebáikki, ii ovddit báikki dát gal. Dáidá baicce muitalit sápmelaččaid ja dáža kultuvrra birra dáppe, lohká Marcus Kumpulainen gii bisánii julggiid ja čielggi njulget.
Son lea bearrašiinnis jođus turistamátkkis Sámis ja ásset muđui Joensuu gávpogis Máttanuorta-Suomas.
Báhčin bilida buori beaggima
Kárášjoga Ealáhussearvvi stivrajođiheaddji Nils Johan Gaup beanta heađástuvvá go gullá mo muhtimat leat goas nu bilidan Kárášjoga diehtojuohkinkárttagalbba. Muitala Kárášjoga servodahkii lea buorre beaggin hirbmat dehálaš, ja dakkár báhčin njeaidá dan. Dán billisteami birra ii leat ovdal gullan.
– Lea njulgestaga heahpat. Dovddan muhtumat eai udno gusto Kárášjoga ovdánit. Sii geat ná láhttejit billistit hui sákka Kárášjoga servodaga ovdii. Olbmot berrejit oalle jođánit gildii cavgilit jus oidnet ovttage bilideamin dáid galbbaid, ávžžuha Nils Johan Gaup.
Lohká lea suddu jus muhtumat bilidit gieldda buori barggu dán láhkai, go dát guoská juohkehažžii gielddas.
– Báhčit E6 alde gos olbmot johtet, lea heaggaváralaš. Lea politiijaid ovddasvástádus dutkat ášši. Olbmot galget dalán dieđihit politiijii jus oidnet ovttage bilideamin dan. Lea issoras go dás báhčalit, ávžžuha Kárášjoga Ealáhussearvvi stivrajođiheaddji Nils Johan Gaup.
Hoteallahoavda moaitá
Scandic Hotealla Kárášjoga direktevra John Arne Mathisen maid ii liiko go diehtojuohkingalba lea báhčaluvvon.
– Turisttaide geat leat boahtimin Kárášjohkii, mearkkaša olu go bisánit diesa. Lea dehálaš gildii ahte lea čorgat ja čáppa go olbmot dasa bisánit. Mii fertet dárkkistit ahte buot diehtojuohkkingalbbat leat čavdásat ja bisánanbáiki vuogas čalbmái, lohká Scandic Hotealla Kárášjoga direktevra John Arne Mathisen.
Cavgil jus dieđát
Kárášjoga Leansmánni politiijabálvá Frank Nilsen lohká easkka dál oažžu dieđu ahte muhtumat leat báhčáladdan dán diehtojuohkingalbba.
– Fertet fitnat geahččamin dan ja guorrat goas dat lea báhččon ja dieđihit eaiggádii vahágahttima birra. Eat dieđe gullá go diehtojuohkingalba Stáhta Geaidnodoaimmahahkii vai Kárášjoga gildii. Jus oktage lea oaidnán dahje gullan dahje diehtá geat leat báhčán dán geaidnogalbba, de cavgil midjiide, ávžžuha Kárášjoga Leansmánne politiijabálvá Frank Nilsen gean mielas lea duođalaš ášši go muhtumat báhčalit geaidnogalbbaid mat leat olbmuid boradan- ja vuoiŋŋastanbáikkis Eurohpá guđešgeainnus.
Sadjásačča sadjásaš ii dieđe
Kárášjoga gieldda plána ja teknalaš- ja birasovddideami ealáhus ossodaga sadjásaš hoavdda Helge Nystad sadjásaš hoavda Kalle Teigen, muitala Nystad boahtá bargui boahtte vuossárgga fas.
– In mun dieđe maidege dán ášši birra, inge dieđe lea go ođđa geaidnogalba. Fertet vuordit vuossárgii ja jearrat Nystadas, lohká gieldda sadjásačča sadjásačča hoavda Kalle Teigen.
