-Almmuhus-
-Almmuhus-
-Almmuhus-
OĐĐASAT– Sámit galggašedje dál geavahit Lipponen cealkaga buorrin

– Sámit galggašedje dál geavahit Lipponen cealkaga buorrin

-

-

Vaikke Lipponen ii leat šat politihkas de lea sus ain vuoibmi, oaivvilda Keskitalo. Su mielas cealkámuš lei dovddastus ahte sámit ja Suoma stáhta oktavuođain leat váilevašvuođat.

Suoma ovddeš stáhtaministtar Paavo Lipponen guldalii Norgga Sámedikki presideantta Aili Keskitalo NordArc-semináras Helssegis mánnodaga ja árvalii ahte sámiin galggašii leat iežaset ovddasteaddji Suoma riikkabeivviin, čállá Yle Sápmi.

NordArc-semináras logai Lipponen iežas boahtán dan oaivilii, ahte Suoma riikkabeivviin galggašii vel okta áirras eambbo ja dat galggašii leat sámiid ovddasteaddji.

 

Cealkámušain ain vuoibmi

Norgga Sámedikki presideanta Aili Keskitalo mielas sámit galggašedje dál geavahit buorrin Paavo Lipponena kommeantta, čállá Yle Sápmi.

Aili Keskitalo mielas okta sadji riikkabeivviin lokte almmolaš ságastallama dási Suoma bealde, muhto stuorat mearkkašupmi livččii su mielas ILO 169-soahpamuša ratifiseremis.

– Dan bokte válddášii Suopma badjelasas geatnegasvuođa sápmelaččaid ektui ja dat lea áibbas eará dat, go dohkkehit, ahte sápmelaš ovddasta sámiid oaiviliid dahje goittot iežas oaiviliid dan riikkabeaivvis, lohká Keskitalo Yle Sápmái.

-Almmuhus-