Sámi­ráđđi lea ásahan sámi kultur- ja dáidda­suorggi jurdda­beasi

Sámiráđđi lea bovden iešguđet sámi kulturbargiid ja dáiddáriid searvat jurddabeassái ja iežaset gelbbolašvuođa bokte hábmet ođđa jurdagiid ja evttohusaid sámi kultur- ja dáiddasuorggi doaibmabijuide logi jagi perspektiivvas.

 Kultur- ja dáiddasuorggis miehtá máilmmi vásihit dál ovtta dain stuorámus hástalusain goassige, ja dilli orru guhká bistimin, dieđiha Sámiráđđi preassadieđáhusa bokte.

– Nationála dásis eiseválddit eai váldde vuhtii sámi kulturbargiid ja ásahusaid hástalusaid iežaset guorahallamiin ja heahteortnegiid bokte. Dan dihtii min mielas lea dehálaš ásahit arenaid gos sámi kultursuorgi beassá digaštallat ja hábmet ođđa jurdagiid ja evttohusaid politihkalaš máilbmái, dadjá Christina Hætta, guhte lea Sámiráđi kulturossodaga hoavda.

Nanusmahttit jurddábesiin

Áigumuš jurddabesiin lea čalmmustahttit sámi kultursuorggi dárbbuid ja vejolašvuođaid, ja buktit ođđa jurdagiid, doaimmaid ja čovdosiid sámi dáidda- ja kuturmáilbmái logi jagi perspektiivvas.

– Mii sávvat ahte jurddábeasi bargu nanusmahtášii suorggi. Mo sihkkarastit nanaguoddevašvuođa sámi kultursuorggis ja mo váldit atnui márkanvejolašvuođaid mat gávdnojit min rájárasttildeaddji kultursuorggis? Dat leat muhtin gažaldagat maid hástalat jurddabeasi vástidit, lohká Hætta.

Jurddabeassi galgá doaibmat jagi ja sis lea vuosttaš čoahkkin bearjadaga čakčamánu 11. beaivvi 2020. Loahppaboađus lea raporta man ulbmilin lea nannet oktasaš sámi kulturpolitihka sihke sámi ja nationála dásis.