-Almmuhus-
OĐĐASATSámi­ráđđi ja Suoma Sámi Nuorat skuvlejit sámi nuoraid

Sámi­ráđđi ja Suoma Sámi Nuorat skuvlejit sámi nuoraid

-

-

Sámiráđđi ja Suoma Sámi Nuorat leat dál bálkáhan golbma ollesáigge oahpahalli bargat Interreg prošeavttain «Filling the EU-Sápmi knowledge gaps».

Oahpahalliprográmma fállá skuvlejumi eamiálbmotvuoigatvuođain ja riikkaidgaskasaš eamiálbmot ovttasbarggus EU, ON ja Árktalaš Ráđi vuogádagain sámiid geahččanguovllus. Juohke oahpahallái nammaduvvo mentor muhtin Sámiráđi ossodagain. Mentor galgá oahpistit oahpahalli earenomáš bargguid bokte, muhto maiddái oppalaččat Sámiráđi bargguin.

Dán čállet sii preassadieđáhusas.

– Mii oaččuimet máŋggaid buriid ohcamušaid. Nuba leamašan midjiide váttis válljet oahpahalliid dáidda virggiide. Midjiide lea somá vásihit man olu beroštupmi gávdno dán prošektii ja bargui, dadjá Niila Inga, guhte lea «Filling the Sápmi-EU knowledge gaps» prošeavtta jođiheaddji preassadieđáhusas.

Oahpahallit

Elle Biehtár Arvo Iiddá, Ida-Maria Helander lea bajásšaddan Avvilis, Suoma bealde Sámis. Son lohká sámiid kultuvrra ja davvisámegiela Oulu universitehta Giellagas-instituhtas. Helander lea Suoma Sámiid Guovddášsearvvi várreságadoalli, Sámiráđi ja Suoma Sámedikki kulturlávdegotti várrelahttu. Son leamašan aktiiva Suoma Sámi Nuorat searvvi doaimmain jagiin 2011-2019. 

Susanna Israelsson lea Jielleváris eret, Ruoŧa bealde Sámis. Son lea bajásšaddan boazodoallobearrašis ja lea aiddo geargan kandidáhtta dutkosiin politihka diehtagis Luleå universiteahtas. Sus lea beroštupmi politihkkii ja eamiálbmotvuoigatvuođaide ja lea Sáminuorra searvvis leamašan sihke várreságadoallin ja čállin. Dát lea addán sutnje vejolašvuođa ovddastit Sáminuora iešguđegelágan čoahkkimiin ja konferánssain sihke riikka dásis ja riikkaidgaskasaš dásis, nugo ON Bissovaš Forumis New Yorkas ja ON dálkkádatrievdama konferánssas COP24 Puolas 2018. 

SÁMINUORAS DUOGÁŠ: Susanna Israelssonis lea beroštupmi politihkkii ja eamiálbmotvuoigatvuođaide ja lea Sáminuorra searvvis leamašan sihke várreságadoallin ja čállin. Preassagovva.
SÁMINUORAS DUOGÁŠ: Susanna Israelssonis lea beroštupmi politihkkii ja eamiálbmotvuoigatvuođaide ja lea Sáminuorra searvvis leamašan sihke várreságadoallin ja čállin. Preassagovva.

Anja Márjá Nystø Keskitalo lea bajásšaddan Guovdageainnus, Norgga bealde Sámis. Son lea lohkame geografiija NTNU:s gos dál lea čállime masterčállosa boazodoalu ja ruovdemáđii hástalusaid birra. Sus lea ovdalaččas bacheloroahppu geografiijas ja servodatekonomiijas ja lea lohkan luonddu- ja resursahálddašeami. Son lea guhká bargan eaktodáhtolaččat iešguđet nuoraid- ja studeanttaidservviin nugo Noereh ja Saemien Studeenth Tråantesne. 

Oahpahalliprográmma álgá ođđajagimánu 1. beaivvi 2021:s ja bistá gitta skábmamánu 2021 lohppii.

-Almmuhus-