Sámiráđđi lea bovden Eamiálbmogiid vuoigatvuođaid áššedovdimekanismma (EMRIP) stáhtagalledeapmái Norgii ságastallat das mo sápmelaččaid ja sámekultuvrra sáhttá suodjalit industriijafidnuin Norgga bealde Sámis.
Industriijafidnut leat lassánan garrasit Norggas, mii heajuda sámiid árbevirolaš ealáhusaid dili. Máŋggat sisabahkkenfidnut leat dál jođus dahje plánejuvvon sámiid árbevirolaš eatnamiidda Norgga bealde Sámis, čállá Sámiráđđi preassadieđáhusas. Sámiráđđi mielde stáhta lea dáin fidnuin rihkkon sámiid eanarivttiid, iešmearridanvuoigatvuohta, kultuvra- ja opmodatrivttiid.
Eai ane árvvus ON julggaštusa
Friija, ovddalgihtii ja informerejuvvon miehtama Ovttastuvvon našuvnnaid eamiálbmotvuoigatvuođaid julggaštusa artihkkala 32:s iige leat implementerejuvvon ja gudnejahttojuvvon dáin sisabahkken fidnuin.
Sisabahkkemat olles Sámis
Sámiráđđi deattuha, ahte sápmelaččat vásihit dáid váttisvuođaid juohke stáhtas gos sámit árbevirolaččat ellet . Goittotge, bovdehusas Eamiálbmogiid vuoigatvuođaid áššedovdimekanismii Sámiráđđi lea vuodjun beare dieidda fidnuide, mat gusket sámeguovllu Norggas, go doppe leat máŋggat fidnut dál jođus, vaikko Norgga lea ratifiseren ILO 169 soahpamuša (ILOC169).
Bivdá čielggademiid ja rávvagiid
Stáhtagalledeapmebivdaga dárkkuhussan lea veahkehit Norgga ja sápmelaččaid identifiseret dárbbuid ja addit teknihkalaš rávvagiid sápmelaččaid álgoálbmotrivttiide guoski nationála láhkaásaheami ja politihkka ovddideamis.
