-Almmuhus-
OĐĐASATSámi viessu Romssas dušše politihkalaš illušuvdna

Sámi viessu Romssas dušše politihkalaš illušuvdna

-

-

Sámedikki Bargiidbellodaga parlamentáralaš jođiheaddji ii loga Romssa Sámi viesu galgat leat politihkalaš illušuvdnan, masa ii leat áigumuš čađahit ásaheami.

Leamaš guhkkit áigge juo sáhka čalmmustahttit sámi ássama Romssas ja Sámi viessu Romssas lea oassi dán čalmmustahttimis.

Sihke sámediggeráđđi ja fylkkaráđđi Romssas lea juolludan ovdaprošeavtta doarjaga Romssa Sámi viesu ovttasbargui. Doaivumis buktá dát bargu ahte Sámi viessu ásahuvvo, mii čohkkehivčče iešguđetlágán sámi gelbbolašvuođa ovtta dáhkki vuollái, čállá Sámedikki Bargiidbellodat preassadieđáhusastis.

 

 

Imašta láigokantuvrra ohcama

Sámediggi lea juo ásahan hálddahuskantuvrraid Romsii ja dat livčče lunddolaš ahte Sámedikki kantuvrrat leat oassin Romssa Sámi viesus.

 – Danne lea imašlaš oaidnit go Sámediggi dál ohcá logi jáhkái láigohit kantuvrraid Romssas. Dán jearaldaga ii sáhte eará láhkái dulkot go ahte Sámediggeráđđi liikká ii beroš ásahit Sámi viesu Romsii. Min oainnu mielde livčče eanet lunddolaš láigohit kantuvralanjaid oanehut áigái, dassážii go Romssa Sámi viesu ásaheapmi čilgejuvvo, cealká parlamentáralaš jođiheaddji Vibeke Larsen.

 

Ii galgga leat politihkalaš illušuvdna

Sámedikkebargiidbellodat oaivvilda Sámediggi dál čájeha ahte sii eai beroš dainna ásahemiin, de ferte bidjat gažaldaga gean sámediggeráđđi dalle dáhttu leat dat deháleamos ovddasmannin, čalmmustahttimin Sámi ássama Romssas?

 – Bargiidbellodaga sámediggejoavku vuordá dál Sámediggeráđi geassádit 10 jagi láigojearaldaga, ja baicce láigohit kantuvrraid oanehut áigái. Sámediggái addošii dalle vejolašvuohta veardidit boahtteáigge kantuvralaigoheami Sámi viesus, go prošeaktabargu lea čađahuvvon.

Bargu ásahit Romssa Sámi viesu, ii galgga leat politihkalaš illušuvdna, mas ii leat áigumuš čađahit ásaheami, loahpaha Vibeke Larsen.

 

Ii kommentere

Sámedikkepresideanta Aili Keskitalo ii háliidan kommenteret ášši, ja čujuha Sámedikki direktevrii Rune Fjellheimii, geasa gullá vástidit láigovistti birra. Ávvir ii leat fitnen ságáide Rune Fjellheima kommenteret ášši.

-Almmuhus-